Mhe. Ridhiwani Kikwete awataka wataalamu kusimamia miradi kama ilivyopangwa

Imewekwa: February 21st, 2023

Mbunge wa Jimbo la Chalinze Mhe.Ridhiwani Kikwete amesema ili wananchi wanufaike na miradi inayotengewa fedha za Serikali ni vema wataalamu kuisimamia miradi hiyo itekelezwe kama ilivyopangwa na kupunguza kero kwa wananchi.

Mhe.Ridhiwani ambaye pia ni Naibu Waziri wa Ardhi Nyumba na Maendeleo ya Makazi ameyasema hayo alipokuwa katika ziara yake kwenye kata kuzungumza na wananchi na kusikiliza kero zao.

"Wataalamu katika maeneo ambao mmetoa ahadi kufanya kazi kukamilisha miradi na kutatua kero za wananchi naombeni mkatekeleze hayo yapo maeneo ambayo ni maalumu yanatakiwa utekelezaji waharaka kuondoa vikwazo vya shughuli nyongine kwa wananchi" amesema .

Amesema Serikali imekuwa ikitenga fedha kwa ajili ya kutatua vikwazo kwa wananchi ili waweze kufanya shughuli zao za kuwakwamua kimaendeleo hivyo wanaopewa jukumu la kusimamia wanatakiwa kufanya hivyo kwa kutokuwa kikwazo.

Akizungumzia kero ya maji amesema upo mradi wa maji Wami unaotekelezwa ambao unatarajia kugharimu biln 44 ambao utakwenda kuondoa kero ya ukosekanaji wa maji kwenye baadhi ya maeneo ambao unachangiwa na baadhi ya mabomba kuchakaa na mengine kupasuka.

Mhe Ridhiwani amesema fedha mradi huo ambao unatarijiwa kukamilika mwishoni mwa Machi mwaka huu tayari  zimetolewa na mkandarasi anaendelea na kazi katika maeneo mbalimbali ya Halmashauri ya Chalinze.

"DAWASA waelewe Rais Samia Suluhu Hassan anarudisha fedha kwa wananchi kwa njia ya kutekeleza miradi ya maendeleo hivyo hakikisheni mradi unatekelezwa kwa wakati wananchi wanufaike nao" amesema

Mhe.Ridhiwani anafanya ziara katika maeneo mbalimbali ya jimbo la  chalinze kusikiliza ba kutia majibu kwa baadhi ya kero za wananchi ambapo kero nyingi zilizoainishwa ni pamoja na maji, migogoro ya ardhi  na barabara.

Awali akizungumza katika mkutano uliofanyika Kijiji cha Hondogo Diwani wa Mandera Leon amemshukuru Mbunge huyo kwa namna anavyotoa fedha kutoka kwenye mfuko wa jimbo na kutekeleza miradi mbalimbali ikiwemo wa barabara, shule  na maji.