Mheshimiwa Ridhiwani Kikwete akabidhi vifaa vya kujifunzia Mazizi

Imewekwa: January 6th, 2023

Mheshimiwa Ridhiwani Kikwete akabidhi vifaa vya kujifunzia Mazizi 

Naibu Waziri wa Ardhi Nyumba na Maendeleo ya Makazi, Ridhiwani Kikwete(Mb) akabidhi vifaa vya Elimu kwa ajili ya kujifunzia wanafunzi wa Shule ya Msingi Mazizi. Vifaa alivyokabidhi ni Madaftari makubwa (Counter book Quire 2) yapatayo 720,kalamu 1000,daftari ndogo 1440,mabegi ya kubebea madaftari,vifaa vya kuchorea,vifutio na vichongeo.

Vifaa hivyo vimetolewa na Bwana Kant ambaye ni mmiliki wa Kampuni ya Shiram Construction Limited inayojishughulisha na shughuli za Ujenzi katika Kijiji cha Mazizi. Kwa mujibu wa taarifa iliyosomwa na Mwalimu Mkuu wa Shule ya Msingi Mazizi,kampuni hii ni mdau mkubwa katika masuala ya Elimu katika kijiji cha Mazizi kwa kutoa misaada mbalimbali ya vifaa vya Elimu ili kuboresha mazingira ya kujifunzia.

Mheshimiwa Ridhiwani Kikwete ambaye alikuwa Mgeni rasmi katika hafla fupi ya kukabidhi vifaa hivyo katika Ukumbi wa kijiji hicho aliipongeza Kampuni hiyo kwa moyo wa utoaji huduma kwa jamii kama mwekezaji na kuzitaka Kampuni zingine zilizowekeza katika halmashauri ya Chalinze kuiga mazuri yanayofanywa na Kampuni ya Shiram Construction Limited ili kutekeleza wito wa Serikali wa kuitaka sekta binafsi kuchangia shughuli za Maendeleo katika maeneo zinakowekeza.

Naye Diwani wa kata ya Msata na Mwenyekiti wa kamati ya Elimu Afya na Maji,Mheshimiwa Selestine Semiono alimpongeza Mheshimiwa Mbunge kwa kukubali wito wa kuja kukabidhi vifaa hivyo na kutoa shukrani zake kwa Serikali ya awamu ya sita jinsi ilivyoweza kuleta fedha za miradi ya Maendeleo katika kata yake ya Msata.

Aidha aliishukuru Serikali kwa kufungua barabara katika maeneo korofi ambayo yalikuwa hayafikiki kipindi cha nyuma lakini sasa panafikika na akamwomba Mheshimiwa Ridhiwani Kikwete kuendelea kuiboresha barabara hiyo.