Rais Samia Suluhu Hassan amkaribisha Rais wa Namibia Ikulu Jijini Dar es salaam

Imewekwa: May 20th, 2025

Na John Mlyambate

Rais wa Jamhuri ya Muungano wa Tanzania, Mhe. Dkt. Samia Suluhu Hassan, amemkaribisha rasmi mgeni wake, Rais wa Jamhuri ya Namibia, Mhe. Netumbo Nandi-Ndaitwah, mara baada ya kuwasili katika viunga vya Ikulu jijini Dar es Salaam tarehe 20 Mei, 2025. Ziara hiyo ni ya kwanza kwa Rais Nandi-Ndaitwah tangu ashike wadhifa huo nchini Namibia.

Mapokezi hayo yamefanyika kwa heshima kubwa na ya kitaifa, yakihusisha gwaride rasmi, nyimbo za mataifa yote mawili, pamoja na salamu za heshima. Rais Samia na mgeni wake walipata fursa ya kuzungumza na kupeana salamu za kirafiki kabla ya kuanza mazungumzo rasmi kuhusu ushirikiano kati ya Tanzania na Namibia.

Mazungumzo ya viongozi hao yanatarajiwa kuimarisha uhusiano wa kidiplomasia na kijamii baina ya nchi hizo mbili, sambamba na kusaini mikataba ya ushirikiano katika nyanja mbalimbali zikiwemo biashara, elimu, afya, na uwekezaji. Ziara hiyo inaashiria kuendelezwa kwa mshikamano wa kihistoria kati ya mataifa hayo rafiki.