RC Kunenge ataka hati safi ziendane na matumizi yenye tija kwa wananchi

Imewekwa: June 25th, 2024

Mkuu wa Mkoa wa Pwani,Mheshimiwa Abubakar Kenenge ametoa pongezi kwa Halmashauri ya wilaya ya Chalinze kwa kupata hati safi,pongezi hizo amezitoa katika Mkutano Maalum wa Baraza la Madiwani wa kujadili hoja za ukaguzi kwa mwaka wa fedha 2022/2023.

Halmashauri ya wilaya ya Chalinze imekuwa ikipata hati safi mfululizo tangu ianzishwe rasmi mwezi Julai 2016 kwa kutumia mapato yake ya ndani kwa kuzingatia vipaumbele ambavyo hupangwa katika Mpango na Bajeti kwa kila mwaka.

“Unaweza kuwa na hati safi lakini Kusiwe na matumizi yenye tija “. Kunenge alisema.

Mkuu wa mkoa wa Pwani  katika hotuba yake ameziagiza Halmashauri zote mkoani Pwani kukusanya mapato na kuyatumia kwa mujibu wa Bajeti na kwa tija ili kuwakwamua wananchi katika changamoto mbalimbali zinazowakabili katika maeneo yao kama Afya,maji na Elimu, amewataka wasimamizi wa Halmashauri kuhakikisha kuwa matumizi yanakuwa na tija suala siyo hati safi.

Mkuu wa mkoa Katika mkutano huo maalum alitoa ufafanuzi kwa Menejimenti na Baraza la madiwani kuwa Halmashauri kuwa na hati safi siyo hoja isipokuwa je vipaumbele vimezingatiwa katika utekelezaji wa Bajeti husika?

Kunenge amezitaka Halmashauri zote katika mkoa wa Pwani kukusanya mapato na kuyatumia kwa tija kwa kuzingatia vipaumbele vilivyopangwa kwa mujibu wa bajeti.

Aidha Mkuu wa Mkoa alimalizia hotuba yake kwa kuwapongeza Madiwani na watendaji katika Halmashauri ya Chalinze kwa umoja wao katika kuwatumikia wananchi na kuwasisitiza kubuni vyanzo vipya vya mapato ili kuwatumikia watanzania kwa kuwapatia huduma sitahiki za Kijamii.

Kwa upande Wake Mwenyekiti wa Halmashauri ya wilaya ya Chalinze,Mheshimiwa Hassani Mwinyikondo kwa niaba ya Baraza la Madiwani alipokea maelekezo ya mkuu wa Mkoa kwa kuahidi kubuni vyanzo vipya vya mapato na kutumia mapato hayo kwa tija na kwa mujibu wa Bajeti ya Halmashauri.