Shirika la ICAP latoa Pikipiki sita Chalinze

Imewekwa: September 30th, 2020

Shirika lisilokuwa la kiserikali la ICAP Tanzania,limetoa msaada wa pikipiki sita (6) kwa vituo vya afya vitatu,zahanati mbili,na hospitali ya wilaya Msoga.Shirika hilo limetoa msaada huo katika halmashauri ya Chalinze kwa ajili ya kuwawezesha watoa huduma za afya kuwafikia watu wanaoishi na virusi vya Ukimwi katika maeneo ya Chalinze,Lugoba,Kiwangwa,Msata,Miono na Msoga.

Kwa Mujibu wa Mratibu wa Mradi  Mkoa,Bwana Ally Mawanja alisema msaada wa pikipiki hizo utawawezesha watoa huduma za afya kuwafikia kwa urahisi  watu wanaoishi na virusi vya Ukimwi na kutoa misaada ya kiafya kwa wakati ili kuimarisha afya zao na kutatua changamoto zinazowasibu wagonjwa.

Mratibu wa Mradi alikabidhi pikipiki hizo kwa Mkurugenzi Mtendaji wa Halmashauri ya wilaya ya Chalinze Bwana, Ramadhani Possi, katika makabidhiano hayo, Mratibu wa Mradi alisema gharama za mafuta na matengenezo zitatolewa na shirika la ICAP kuanzia sasa hadi mwisho wa mradi.

Kwa upande wake Mkurugenzi Mtendaji wa Halmashauri ya wilaya ya Chalinze Bwana Ramadhani Possi alilishukuru shirika la ICAP Kwa kuwawezesha wataalamu wa afya vitendea kazi na kuwaahidi kuwa Pikipiki hizo zitafanya kazi zilizokusudiwa na si vinginevyo.

Mkurugenzi Possi baada ya kukabidhiwa pikipiki hizo alikabidhi kwa wataalamu wa afya katika vituo sita vya afya na kuwataka watumishi hao kuzitunza Pikipiki hizo na kuzitumia kwa matumizi sahihi.