TARURA Yawasilisha Bajeti ya Matengenezo ya Barabara Chalinze

Imewekwa: December 19th, 2022

Meneja wa Wakala wa Barabara za Vijijini na Mijini wa Wilaya ya Bagamoyo,Mhandisi Ndyamukama amewasilisha Mpango na Bajeti wa Matengenezo ya Barabara kwa Mwaka wa fedha 2023/2024 kwa Halmashauri ya Chalinze. Amewaasilsha bajeti hiyo leo katika kikao maalum cha Baraza la Madiwani wa Halmashauri ya wilaya ya Chalinze kilichofanyika katika Ukumbi wa Jakaya Kikwete.

Akiwasilisha Bajeti hiyo Meneja wa TARURA aliwasilisha malengo makuu kuwa ni Kuhakikisha maeneo hasa yenye huduma za kijamii na Uzalishaji yanafikika,Kuhakikisha Kata zote zinaunganishwa,Kuhakikisha Halmashauri ya Chalinze inaunganishwa na wilaya jirani na kuhakikisha takataka na magugu kwenye mifereji hasa barabara za Mitaa vinaondolewa.

Mhandisi Ndyamukama aliendelea kufafanua kuwa mpango huo wa Bajeti utatekelezwa kupitia Fedha za Mfuko wa Barabara Jumla ya fedha za kitanzania Milioni 695 ambazo zitafanya matengenezo ya barabara kilomita 82.1,Fedha za Tozo Jumla ya fedha za kitanzania Bilioni 1 ambazo zitafanya matengenezo ya barabara Kilomita 82,Fedha za Mfuko wa Jimbo jumla ya fedha za kitanzania Milioni 500 ambazo zitafanya matengenezo ya barabara kilomita 18 na Mpango wa Matengenezo wa Fedha za Maendeleo jumla ya fedha za kitanzania Bilioni 7.3 ambazo zitatumika katika matengenezo ya barabara kwa kilomita 97.7 katika viwango mbalimbali kwa maana ya changarawe na lami.

Aidha Mpango na Bajeti ulipokelewa na Baraza la Madiwani na kupongezwa kwa Mpango bora uliogusa maeneo yote korofi na kuhakikisha kuwa maeneo yote yanaunganishwa na mtandao wa barabara.

Mwenyekiti wa Halmashauri Mheshimiwa Hassani Mwinyikondo kwa niaba ya Madiwani aliipongeza TARURA kwa kufanya shughuli zake katika hali ya uwazi na akazitaka Taasisi zingine kuiga utamaduni mzuri unaofanywa na TARURA kwa kuweka bayana shughuli zinazofanyika kwa maslahi ya watanzania.

Naye Mwenyekiti wa Chama cha Mapinduzi wilaya ya Bagamoyo Mheshimiwa Zahor Sharrif aliipongeza TARURA kwa Mpango mzuri wa Bajeti kwa mwaka 2023/2024 na kuipongeza Halmashauri kwa shughuli mbalimbali za Maendeleo zinazofanywa na Halmashauri ya hiyo na kukitaka Kitengo cha Mawasiliano Serikalini kuendelea kuyatangaza mafanikio ya Halmashauri kupitia Mitandao ya Kijamii na vyombo mbalimbali vya habari na kupitia Redio ya Halmashauri ya Chalinze.