ABBOT FUND kufadhili ujenzi wa jengo la huduma za dharula Hospitali ya Wilaya Chalinze- Msoga

Imewekwa: September 14th, 2021

Naibu Waziri wa Afya Mhe. Dkt. Godwin Mollel amempongeza Rais Mstaafu wa awamu ya nne Mhe.  Dkt. Jakaya Mrisho Kikwete kwa jitihada zake katika kuleta maendeleo ya afya nchini kwa kuendelea kuiunga mkono serikali ya Jamhuri ya Muungano wa Tanzania kwa kujenga mahusiano mazuri na ABBOT.

Ameyasema hayo leo kwenye hafla fupi ya Makabidhiano ya Nyaraka za ujenzi na eneo la Ujenzi wa Jengo la matibabu ya dharula (EMD) kutoka ufadhili wa ABBOT ya nchini Marekani ambapo ufadhili huo unagharimu kiasi cha TSh bilioni 1.2 za Kitanzania.

Aidha Mhe. Naibu Waziri amemuahidi Mbunge wa Jimbo la Chalinze Mhe. Ridhiwan Kikwete kuwa atahakikisha Jimbo la Chalinze litapatiwa gari la wagonjwa moja ambapo ni gari hilo ni moja ya magari 150 yatakayonunuliwa na Serikali inayoongozwa na Rais wetu Mhe. Samia Suluhu Hassan.

" Nafurahi sana kuwa hapa leo kwa rafiki yangu wa siku nyingi Mhe. Ridhiwani Kikwete Mbunge wa jimbo la Chalinze na katika kumuunga mkono ninamuahidi Mhe. Ridhiwani kumpatia gari la wagonjwa moja kati ya magari 150 ya wagonjwa yanayotarajiwa kununuliwa hivi karibuni ". Alisema Mhe. Mollel

Hata hivyo Mhe.Naibu Waziri wa Afya amewapongeza Mbunge wa Jimbo la Chalinze Mhe. Ridhiwan Kikwete pamoja na Mkurugenzi Mtendaji wa Halmashauri ya Wilaya ya Chalinze Ndugu Ramadhan Possi kwa kusimamia vyema fedha zinazotolewa na Serikali  katika kufanya maendeleo ya sekta ya afya  kwa manufaa ya Halmashauri na ya nchi kwa ujumla.

Aidha nae Rais mstaafu wa awamu ya nne Mhe. Jakaya Mrisho Kikwete ameiomba Ofisi ya Naibu Waziri wa Afya wasichelewe kuanza mafunzo kwa wahudumu watakaohudumia kitengo cha Wagonjwa wa dharula ambapo alisema,

" Ili kuondoa adha ya Wahudumu na wafanyakazi wa huduma za matibabu ya dharula ili hali ujenzi wa jengo umekamilika hivyo hakuna budi kuomba mafunzo hayo yaanze mara moja ". Alisema Mhe. Kikwete.

Hata hivyo Mhe. Rais Mstaafu Kikwete alisema ili kumuunga mkono Rais wetu wa Jamhuri ya Muungano wa Tanzania Mhe. Samia Suluhu Hassan ni lazima kuchapa kazi.

Vilevile Mbunge wa Jimbo la Chalinze Mhe. Ridhiwan Kikwete ameishukuru na kuahidi kutoa  ushirikiano kutoka kwa  Taasisi ya ABBOT kwa ufadhili wa jengo la matibabu ya dharula (EMD) katika hospitali ya Wilaya ya Chalinze

"Tunawashukuru ABBOT kwa ufadhili huu na pia niwaombe Wananchi wenzangu wa  Chalinze kuweza kutoa ushirikiano na kuulinda mradi huu ili tuweze kufanikisha mradi huu na kuhakikisha  unafanikiwa na kuisha vyema ili kuleta maendeleo ya Afya nchini na kwa Halmashauri kwa ujunla" Alisema Mhe. Ridhiwani.

Kwa mujibu wa Mwakilishi kutoka ABBOT amesema mradi huoo utakuwa wa kwanza kwa ngazi ya Wilaya katika Halmashauri ya Chalinze na pia mradi huo utakamilika ndani ya miezi 12 tu na ujenzi huo utagharimu kiasi cha shilingi Bilioni 1.2 za kitanzania.

Tukio hilo la Makabidhiano limehudhuliwa na  wageni mbalimbali akiwemo Naibu waziri wa afya Mhe. Dkt  Godwin Mollel,Rais mstaafu wa awamu ya nne Mhe. Jakaya Kikwete, Mkuu wa Mkoa wa pwani Mhe. Abubakari Kunenge, Mkuu wa wilaya ya Bagamoyo Mhe. Zainabu Abdallah pamoja na wenyeji wao Makamu Mwenyekiti wa Halmashaurin Mh: Msumi na Mkurugenzi Mtendaji wa Halmashauri ya Wilaya ya Chalinze.