Mkuu wa wilaya ya Kibaha afungua mafunzo ya kuwajengea uwezo madiwani Chalinze na Kibaha

Imewekwa: January 15th, 2026

Na John Mlyambate

Mkuu wa Wilaya ya Kibaha, Mheshimiwa Nickson Simon John, amefungua rasmi mafunzo ya kuwajengea uwezo madiwani wa halmashauri mbili za Chalinze na Kibaha yanayofanyika katika Ukumbi wa Mikutano wa Ofisi ya Mkuu wa Mkoa wa Pwani.

Mafunzo hayo yanalenga kuwajengea uwezo madiwani wa halmashauri za wilaya za Chalinze na Kibaha kwa kipindi cha siku tatu mfululizo, ili kuwawezesha kutekeleza majukumu yao kwa ufanisi mara baada ya kuchaguliwa.

Katika mafunzo hayo, madiwani wanapatiwa elimu katika masuala mbalimbali ikiwemo Uongozi na Utawala Bora, Muundo, Majukumu na Madaraka ya Serikali za Mitaa, pamoja na uendeshaji wa vikao na mikutano katika mamlaka za serikali za mitaa.

Vilevile, mada nyingine zinazofundishwa ni Mipango, Bajeti na Usimamizi wa Miradi ya Maendeleo, Usimamizi na Udhibiti wa Fedha, Usimamizi wa Watumishi katika Mamlaka za Serikali za Mitaa, pamoja na wajibu, majukumu, haki na stahiki za diwani.

Mafunzo hayo pia yanahusisha maadili ya madiwani, usimamizi wa ardhi katika mamlaka za serikali za mitaa pamoja na masuala mtambuka yanayogusa maendeleo ya jamii na ustawi wa wananchi kwa ujumla.

Mafunzo yameandaliwa na Chuo cha Serikali za Mitaa Hombolo kwa lengo la kuwajengea uwezo madiwani katika utendaji kazi wao kwa kuzingatia Katiba, sheria, taratibu na kanuni za uendeshaji wa mamlaka za serikali za mitaa nchini, sambamba na sheria ya Serikali za Mitaa (Mamlaka za Wilaya).

Akizungumza katika hotuba yake ya ufunguzi, Mheshimiwa Nickson Simon John amewaasa madiwani kuzingatia sheria, taratibu na kanuni katika kuwatumikia wananchi, kutumia kauli za kujenga badala ya kubomoa, na kufanya kazi kwa ushirikiano na watumishi wa serikali za mitaa bila kuunda makundi, akisisitiza kuwa kiongozi bora ni yule anayewaunganisha wananchi na kuimarisha mshikamano katika jamii.

Kwa upande wake Diwani wa kata ya Mandera na Mwenyekiti wa Halmashauri ya wilaya ya Chalinze Mheshimiwa Leon Mgweno ameishukuru serikali kwa kuandaa mafunzo hayo ambayo yatawawezesha waheshimiwa Madiwani kufanya kazi zao kwa weledi na kwa kuzingatiwa utawala bora katika maeneo yao ya kufanyia kazi.

Naye Diwani wa kata ya Kiwangwa,Mheshimiwa Malota Kwaga amesema mafunzo hayo ya siku tatu yataimarisha ushirikiano miongoni mwa madiwani,kuwasaidia kusimamia sheria ndogo za halmashauri na kuwajengea uwezo kuhusu nafasi yao kama viongozi wa wananchi.