Halmashauri ya Chalinze yapokea ugeni kutoka Halmashauri ya Njombe kwa ziara ya Mafunzo

Imewekwa: July 15th, 2022

Halmashauri ya Wilaya ya Chalinze hii leo imepokea ugeni kutoka Halmashauri ya Wilaya ya Njombe ambapo ugeni huo una lengo la kujifuza Ukusanyaji wa Mapato kupitia Ushuru wa madini ya kokoto pamoja na vyanzo vinginevyo.

Ugeni huo umeongozwa na  na Viongozi wa Halmashauri hiyo ya Njombe  ambaye ni Mheshimiwa Mwenyekiti wa Halmashauri hiyo Mhe Valentino Aidan Hongoli Pamoja na Mkurugenzi Mtendaji Bi, Sharifa Nabalanganya wakiongozana na baadhi ya Madiwani pamoja na wataalam.

Katika ziara hiyo ugeni huo umepata fursa ya kufanya kikao kifupi ambacho kimejumuisha baadhi ya wataalam kutoka Halmashauri zote mbili ambapo Afisa Habari wa Halmashauri ya Wilaya ya Chalinze Ndg. John Mlyambate kwa niaba ya Mkurugenzi Mtendaji aliwasilisha taarifa hiyo kwa wageni hao kwa lengo la kuifahamu miradi,vyanzo vya mapato pamoja na jinsi ya ukusanyaji wa mapato kwa Halmashauri.

Mara baada ya Uwasilishwaji wa taarifa hiyo,wageni hao wamepata wasaa wa kutembelea vyamzo mbalimbali vya mapato pamoja na baadhi ya miradi iliyojengwa kwa mapato ya ndani ikiwemo makarasha ya kupasulia kokoto,kituo cha mabasi,soko,vituo vya afya pamoja na Miradi ya Serikali kuu ambayo Halmashauri imetia nguvu katika umaliziaji.

Ndipo Mwenyekiti wa Halmashauri ya Wilaya Njombe Mhe Hongoli Ameelezea dhamira iliyowafanya kufika katika Halmashauri hii na jinsi gani wamepokea na taarifa za miradi na vyanzo vya mapato na kujionea vyanzo hivyo amabapo amesema

“Tumekuja  kujifunza kwa jinsi gani mnavyoibua  vyanzo vya mbalimbali vya mapato na namna ya kusimamia vyanzo hivyo na kama tulivyoona kwenye taarifa yenu kuwa mna vyanzo vingi vya mapato kwani tumeona tangu kuanza kwa Halmashauri hii mmeanza na ukusanyaji wa mapato wa Tzs Bil.3.8  mpaka kufikia Tzs Bil.10.7 ambapo hii leo tumeona kuwa mapato yatokanayo na madini ya kokoto kwa mujibu wa taarifa mliyotusomea ndio chanzo kikuu kwa hapa Chalinze na pia hayo yamejidhihirisha  mara baada ya kutembelea baadhi ya makarasha ambayo yanatumika kuzalisha madini hayo”. Amesema Mhe Hongoli.

Kwa upande wake Mkurugenzi wa Halmashauri ya Wilaya ya Njombe Bi Sharifa ameishukuru Menejimenti ya Halmashauri ya Wilaya ya Chalinze kwa ukarimu walioupata Chalinze na kuahidi wataendelea kujifunza vitu vingi Zaidi hasa katika ukusanyaji wa mapato wa madini ujenzi.

“ Tunashukuru kwa ukarimu wenu mliotuonesha na tumejifunza vya kutosha hapa Chalinze hasa katika kuibua na ukusanyaji wa mapato wa madini ujenzi kwani ndio chanzo chenu kikubwa cha mapato basi nasi ndio chanzo ambacho tumeakianzisha ikiwa mwanzoni kwa Halmashauri yetu tulikuwa tunategemea ukusanyaji wa mapato hasa katika mazao ya misitu hivyo basi tunaahidi kwenda kuyafanyia kazi yale yote tuliyojifunza kwenu”. Mkurugenzi alisema.

Aidha  Mwenyekiti wa Halmashauri ya Wilaya ya Chalinze Mhe. Hassan Mwinyikondo kwa niaba ya Halmashauri ameuambia ugeni huo kuwa ujio wao hapa Chalinze umefanya nao kujifunza na kupata mawazo chanya juu ya kuendeleza na kuboresha miradi mbalimbali.

Niwashukuru sana wageni wetu kwa kufika hii leo kwani ujio wenu pia umefanya tubadilishane mawazo mbalimbali yalio chanya ambayo itasaidia  kuendeleza Halmashauri zetu kwa kuibua na kuboresha miradi yetu”. Amesema Mhe.Mwinyikondo.

Hata hivyo Mhe.Mwinyikondo aliendelea kusisitiza ushirikiano baina ya Halmashauri zote hizi mbili katika kupeana ushauri na kuweka uzalendo mbele ili kuzipa maendeleo Halmashauri na Taifa kwa ujumla.

Naye kaimu Mkurugenzi wa Halmashauri ya Wilaya ya Chalinze Bi.Salama Ndyetabura ameushukuru uongozi wa Halmashauri ya Njombe kwa ujio wao na kuahidi kuyafanyia kazi yale yote ya kujenga yalioshauriwa.

“ Kwa niaba ya Mkurugenzi Mtendaji wa Halmashauri ya Chalinze ninaomba niwashukuru wageni wetu kwa kufika katika Halmashauri yetu na pia tunawaahidi kuyafanyia kazi yale yote tuliyoyapata kutoka kwenu na pia tunawakaribisha Chalinze siku nyingine kwa ajili ya fursa mbalimbali zinazopatikana katika Halmashauri yetu na eneo letu kwa ujumla kwani pia tuna mradi wa viwanja kwa baei nafuu vilivyopo eneo la Msolwa”. Amesema Bi. Salama.

Aidha Kuja kwa wageni hao ni muendelezo wa kupokea kundi kubwa la wageni kutoka katika Halmashauri na taasisi mbalimbali nchini ambazo zimekuja kujifunza ni kwa jinsi gani Halmashauri ya Wilaya ya Chalinze inapiga hatua tangu kuanzishwa kwake mnamo mwaka 2016 mpaka sasa katika suala la kuibua miradi,ukusanyaji wa mapato na usimamizi mzuri wa fedha za Serikali katika miradi mbalimbali.