Halmashauri ya wilaya ya Chalinze yaadhimisha Juma la Kisomo

Imewekwa: October 17th, 2022

Halmashauri ya Wilaya ya Chalinze yaadhimisha juma la Kisomo.

Halmashauri ya Wilaya ya Chalinze hii leo tarehe 17 /10/2022 imeadhimisha juma la kisomo katika viwanja vya shule ya msingi Lugoba kwa lengo la kuhamasisha jamii kushiriki katika shughuli za watu wazima pamoja na elimu nje ya mfumo rasmi ambapo huazimisha wiki la kwanza kwa kila mwezi septemba.

Akizungumza wakati wa maadhimisho hayo mgeni rasmi wa hafla hiyo Mwenyekiti wa Halmashauri ya Wilaya ya Chalinze Mhe.Hassan Rajab Mwinyikondo amewapongeza Maafisa elimu kwa maandalizi mazuri ya maadhimisho haya pamoja na kuwaomba maafisa maendeleo ya jamii kuwasaidia wale wote watakaopata elimu ya watu wazima kuunda vikundi ili iwe rahisi kusaidiwa kupata mikopo ya kujiendeleza kiuchumi.

“Nawaomba maafisa wenye dhamana tujitahidi kuwapa mbinu na elimu za kuwatengenezea vikundi wale wote watakaopata elimu ya watu wazima ili Halmashauri iweze kuwapa mikopo kwa vikundi vyao ili iwe kama motisha na kuchochea kupunguza wimbi la watu wasiojua kusoma na kuandika pamoja kutoa ajira kwa wote watakaohitimu elimu hiii ya watu wazima”. Amesema Mhe.Mwinyikondo.

Mhe. Mwinyikondo ameendelea kwa kumshukuru Rais wa Jamhuri ya Muungano wa Tanzania Mhe. Samia Suluhu Hassan kwa kuruhusu na kuanzisha mpango wa elimu wa kuwapa fursa wale wote waliokatiza masomo yao kurudia masomo na kuahidi kama Halmashauri ya Chalinze itaendelea kuunga mkono juhudi za Mheshimiwa Rais na Mbunge wa Jimbo la Chalinze katika kuendeleza elimu hii ya watu wazima kwa kutenga bajeti kwaajili ya kuvisaidia vituo vinavyotoa huduma hiyo.

Aidha akisoma taarifa ya elimu ya watu wazima na elimu isiyo rasmi kwa Halmashauri ya Wilaya ya Chalinze Afisa elimu wa Elimu ya Watu wazima Ndg.Selemani Nkunguu amesema kuwa mpaka sasa kuna idadi ya watu 75 ambapo wanaume ni 25 na wanawake 50 na kisomo cha kujiendeleza kwa watumishi ambapo kuna jumla ya walimu 62 wanaosoma kutoka ngazi ya cheti,stashahada na shahada na kuhamasisha vikundi vya Mkeja yaani vikundi vya watu wazima vinavyofanya shuguli za mikono vyenye jumla ya wanakikundi 158 pamoja na kuhamasisha shughuli za ufundi stadi ambapo ina jumla ya wanakikundi 36.

Pamoja na hayo ametoa mafanikio yaliyopatikana na uwepo wa elimu hiyo katika Halmashauri ya Wilaya ya Chalinze ikiwa ni pamoja na watoto wengi waliokosa elimu kupata elimu,wanafunzi wa MEMKWA kuweza kuendelea na elimu ya sekondari ambapo zaidi ya vijana 109 ikiwa wasichana 49 na wavulana 60 wameweza kuendelea na elimu ya sekondari pamoja na kuhamasisha watu wazima kujiunga na elimu ya watu wazima hasa jamii ya kimasai.