Halmashauri za Chalinze na Bagamoyo zaanza maandalizi ya Mwenge wa Uhuru

Imewekwa: February 21st, 2020

Kamati ya Sherehe wilaya ya Bagamoyo,imeanza maandalizi ya mapokezi ya mbio za mwenge wa Uhuru kwa mwaka 2020.

Kamati hiyo imeanza kikao chake cha kwanza leo katika ukumbi was halmashauri ya Bagamoyo chini ya Uongozi wa Mkuu wa wilaya ya Bagamoyo Mheshimiwa Zainabu Rashidi Kawawa.

Kamati hiyo imejumuisha wajumbe wa kamati ya Ulinzi na usalama,wakuu wa Idara kutoka halmashauri zilizo ndani ya wilaya ya Bagamoyo yaani Bagamoyo na Chalinze na wadau wa maendeleo wilayani Bagamoyo.

Katika kikao hicho,mwenyekiti aliwashukuru wajumbe wa kamati hiyo kwa kufanikisha mapokezi ya mbio za mwenge wa Uhuru kwa mwaka 2019 yaliyofana kwa kiasi kikubwa na kuwataka kuzifanyia kazi changamoto zilizojitokeza mwaka jana. Kawawa aliwashukuru wananchi wa halmashauri zote mbili kwa namna walivyojitokeza kwa wingi katika mapokezi ya mwenge wa Uhuru na kuwashukuru wadau wote waliofanikisha kwa kutoa michango mbalimbali ya hali na mali na kuwashukuru watumishi wote wilayani Bagamoyo kwa uzalendo wa hali ya juu waliouonyesha mwaka jana.

Aidha Mkuu wa wilaya amewataka wakuu wa Idara wote wilayani Bagamoyo kuchambua miradi itakayopitiwa na mwenge wa Uhuru kwa mwaka huu wa 2020 inazingatia mwongozo na vigezo vya mashindano ya mbio za mwenge wa Uhuru na iwe na ubora unaotakiwa na kuwataka waratibu wa mwenge wa halmashauri ya Chalinze na Bagamoyo kuisoma miongozo kwa umakini na kushauri pasipo hofu,ili halmashauri zetu ziweze kupata ushindi stahiki usiokuwa na mashaka.

Kwa upande wake Mwenyekiti wa Chama Cha Mapinduzi wilaya ya Bagamoyo Mheshimiwa Zahoro amewataka wanabagamo kwa ujumla kuupokea mwenge wa Uhuru kwa heshima zote na wananchi kwa wingi katika mapokezi hayo na kuwataka vikundi vya hamasa kuanza maandalizi mara moja kwani muda umekwisha.

Naye Katibu Tawala wa wilaya ya Bagamoyo Bi Kasilida Mgeni amewataka wananchi hususan watumishi kuzingatia vigezo vya mashindano ya Mwenge na kuzingatia Itifaki ya Mwenge wa Uhuru wakati mwenge ukikimbizwa na kuitaka kamati ya usafirishaji kusimamia suala zima la magari yanayokuwa katika msafara kwa mujibu wa mwongozo.

Hata hivyo Mwenge wa Uhuru unategemea kuingia mkoani Pwani tarehe 18/04/2020 hadi tarehe 26/04/2020 na kukimbizwa katika halmashauri zote tisa za mkoa huo.