Jamii yaaswa matumizi ya kiasi katika vyakula vyenye mafuta, sukari na chumvi

Imewekwa: June 3rd, 2025

Jamii imetakiwa kuzingatia matumizi ya kiasi katika ulaji wa vyakula vyenye mafuta mengi, sukari nyingi na chumvi kupita kiasi, ili kuepuka hatari ya kupata magonjwa sugu yasiyoambukiza.Wito huo umetolewa leo na Afisa Lishe wa Halmashauri ya Chalinze, Lucas Eliakim Molell, wakati akizungumza katika kipindi cha Gumzo Leo kinachorushwa na Chalinze FM kila Jumatatu hadi Ijumaa kuanzia saa 4:00 hadi 7:00 mchana.

Aidha Molell amesema ulaji wa chumvi nyingi huongeza hatari ya shinikizo la damu, ugonjwa wa moyo na kiharusi. Aidha, alibainisha kuwa matumizi ya sukari kupita kiasi yanachangia kuongezeka kwa uzito wa mwili, kuibuka kwa ugonjwa wa kisukari pamoja na matatizo ya moyo.

Pia afisa lishe aliongeza kuwa jamii inapaswa kuepuka unywaji wa vinywaji vyenye sukari nyingi kama soda, juisi bandia, pamoja na ulaji wa vitafunwa kama keki na pipi. Badala yake, ameshauri watu kutumia matunda halisi na kunywa maji ya kutosha kama njia bora ya kujikinga na magonjwa hayo.

Vile vile, Molell amesisitiza umuhimu wa kuepuka ulaji wa vyakula vyenye mafuta mengi, hasa yale yanayoganda, akieleza kuwa vyakula hivyo huweza kusababisha ongezeko la uzito, kuziba kwa mishipa ya damu, na hatimaye kusababisha magonjwa ya moyo. Ametoa ushauri kwa jamii kutumia mafuta yanayotokana na mimea ambayo ni salama zaidi kwa afya.

Shirika la Afya Duniani (WHO) limeweka miongozo madhubuti kuhusu ulaji wa vyakula vyenye chumvi nyingi, mafuta mengi, na sukari nyingi ili kupunguza hatari ya magonjwa yasiyoambukiza kama shinikizo la damu, kisukari, magonjwa ya moyo, na kiharusi