Kamati ya Afya,Elimu na Maji yakagua Miradi ya Maendeleo Chalinze

Imewekwa: January 30th, 2024

Kamati ya Afya,Elimu na Maji katika Halmashauri ya wilaya ya Chalinze ikiongozwa na Mwenyekiti wa Kamati hiyo Mheshimiwa Selestine Semiono imekagua miradi mbalimbali ya Maendeleo katika sekta ya Afya na Elimu.

Ukaguzi wa miradi hiyo umefanyika Leo hii katika kata za Msoga,Mandera na Mkange kwa robo ya pili ya mwaka wa fedha 2023/2024. Kamati hiyo imeweza kufika katika Hospitali ya Halmashauri ya Msoga na kuona hatua za awali za Ujenzi wa Jengo la Utawala ambalo maandalizi ya kuchimba msingi wa jengo hilo ambalo litajengwa gorofa moja. Katika ukaguzi wa mradi huo wajumbe wa Kamati walitoa ushauri kwa Menejimenti ili kasi ya Ujenzi huo iongezeke ili mradi ukamilike kwa wakati na huduma ziweze kutolewa kwa wananchi.

Kwa upande wa sekta ya Elimu Kamati ilifika Shule ya Sekondari ya wasichana ya Mandera katika kata ya Mandera,katika Shule hiyo Kamati iliweza kukagua Ujenzi wa Bweni la wasichana lililojengwa kutokana na fedha kutoka Serikali kuu,jumla ya fedha za kitanzania milioni 100 zimetumika katika utekelezaji wa mradi huo ingawa haujakamilika. Kwa mujibu wa Afisa Elimu Sekondari Bi. Salama Ndyetabura alisema ili liweze kukamilika na kuanza kutumika kunahitajika Jumla ya fedha za kitanzania milioni 58.

Katika Mradi huo wajumbe walifurahishwa na ubora wa mradi huo na kushauri pamoja na kusubiri fedha za ukamilishaji kutoka Serikali kuu ni vema mradi huo kuingia katika bajeti inayoandaliwa sasa kwa ukamilishaji. Sanjari na maoni ya kamati hiyo Kamati ilitoa pongezi kwa walimu na wanafunzi kwa matokeo mazuri ya kidato cha nne kwa mwaka 2023,kwani kiwango cha ufaulu katika shule hiyo kimeongezeka.

Aidha Kamati ya Afya, Elimu na Maji ilifika katika kijiji cha Mkange na kukagua mradi wa Ujenzi wa Shule ya Sekondari ya Mkange ambayo imeanzishwa kwa nguvu za wananchi na wadau mbalimbali katika Kata ya Mkange.

Wana kamati wa Kamati ya Elimu wametoa Pongezi kwa wananchi wa Kata ya Mkange kwa kujitoa katika ujenzi huo ambao utaondoa changamoto ya watoto kwenda kusoma mbali . Wajumbe wamependekeza katika bajeti hii inayoandaliwa kutengwe fedha kwa ajili ya ukamilishaji Ujenzi wa shule hiyo ili kuondoa kero ya huduma ya Elimu kwa watoto wa kata ya Mkange.