Kamati ya Fedha Utawala na Mipango yakagua Migodi ya Uchimbaji kokoto Chalinze

Imewekwa: January 18th, 2019

Kamati ya fedha,utawala na mipango ya halmashauri ya wilaya ya Chalinze imeanza ziara ya kukagua na kuona vyanzo vya mapato vinavyotokana na madini ya kokoto katika makampuni ya Z&A,Lavender Infrastructure, China Gold,Nyanza Road Works,Jiwe Project, Mhingara Company Ltd na Grand tech.

Kamati hiyo imeanza kufanya ziara hiyo kwa robo ya pili ya mwaka wa fedha 2018/2019, katika ziara hiyo wajumbe wamehoji kutaka kujua makampuni ya uchimbaji madini yanalipa kodi ya huduma na ushuru wa mapato yatokanayo na kokoto.

Kwa upande wake mwenyekiti wa halmashauri ya wilaya Mheshimiwa Said Zikatimu na kamati ya fedha alitaka kujua kama makampuni hayo yanalipa ushuru na kodi kwa mujibu wa sheria ya fedha namba 9 ya serikali za mitaa ya mwaka 1982."Lengo la halmashauri yetu ni kukusanya mapato kwa zaidi ya asilimia 100 Ili kuvuka malengo ya bajeti yetu na kuziba mianya yote ya ukwepaji kodi na shuru mbalimbali. "Zikatimu alisema.

Hata hivyo kamati ya fedha ilipokuwa ikikagua shughuli za uchimbaji wa kokoto iliweza kubaini baadhi ya makampuni kuendesha shughuli zake pasipo kuwa na nyaraka mbalimbali za kisheria kama leseni ya kuchimba madini,leseni ya biashara na nyaraka zingine kwa mujibu wa sheria.

Kamati ilipobaini mapungufu hayo ilitoa maagizo kwa wamiliki wa kampuni hizo kuwasilisha nyaraka husika ofisi ya mkurugenzi mtendaji haraka iwezekanavyo vinginevyo hatua za kisheria zitachukuliwa dhidi ya makampuni tajwa kwa kukiuka sheria za uwekezaji.