Kamati ya Fedha,Utawala na Mipango yakagua Vyanzo vya Mapato

Imewekwa: August 18th, 2018

Kamati ya Fedha,Utawala na Mipango imekagua vyanzo vya Mapato katika Halmashauri ya Chalinze kwa kutembelea mgodi wa Kokoto wa  YAATE Investment Co Ltd,na kuona uzalishaji na ubora wa kokoto zinazozalishwa katika mgodi huo. Mgodi huo ni mgodi unaozalisha kokoto zinazotumika kujenga Reli ya kisasa "Standard gauge" kutoka Dar es salaam hadi Morogoro kwa awamu ya kwanza. Mgodi huu ni mgodi unaotoa kokoto bora kwa Afrika Mashariki na Kati,lakini pia Kokoto kwa Chalinze ni chanzo kikuu cha Mapato kinachoiwezesha Halmashauri kutekeleza miradi ya Maendeleo na utoaji huduma za Jamii.

Wajumbe wa Kamati hii wakiongozwa na Makamu Mwenyekiti wa Halmashauri ya Wilaya ya Chalinze Mhe.Madaraka Mbode waliishukuru kampuni kwa uzalishaji wa Kokoto bora ambayo imekubalika kimataifa hata kutumika katika ujenzi wa Reli ya kisasa na kusababisha Halmashauri kupata Mapato ya kutosha kutokana na uhitaji mkubwa wa madini hayo.

Naye Mwenyekiti wa Kamati ya huduma za Jamii Mhe.Malota Kwaga aliwapongeza kampuni ya YAATE kwa kuwa waaminifu katika kulipa Mapato ya Halmashauri na serikali kwa ujumla na kuwasisitiza kutunza takwimu zao za uzalishaji Kokoto kwa uhakiki pindi zinapohitajika na wadau.

Aidha Kamati ya Fedha ilitembelea katika eneo la Ujenzi wa ofisi ya Halmashauri katika mji wa Chalinze na kukagua namna Ujenzi unavyoendelea. Kwa mujibu wa Msimamizi wa Ujenzi wa jengo hilo,Bwana John Chizima alieleza Ujenzi huu upo katika hatua ya kwanza yaani Ujenzi wa Msingi na baada ya hapo hatua ya pili itafuata. Katika Ujenzi huu kuna changamoto zinazopelekea Ujenzi kusuasua ni kukosekana kwa nishati ya umeme kwa ajili ya Kazi ya kuchomelea vyuma na matumizi mengineyo. Katika ukaguzi huo Kamati iliagiza suala la umeme lishughulikiwe na Mhandisi Mshauri kwa kushirikiana na Menejimenti ya Halmashauri ili Ujenzi ueweze kuendelea kwa kasi na umalizike kwa mujibu wa mkataba."Tunaagiza suala la upatikanaji Umeme litafutiwe ufumbuzi haraka iwezekanavyo na shughuli za ujenzi ziendelee."Mbode alisema.

Ujenzi wa Msingi wa Jengo la Halmashauri ya Wilaya ya Chalinze katika Mji wa Chalinze ,ukiwa katika hatua za awali.

Wajumbe wa Kamati ya Fedha,Utawala na Mipango wakipata taarifa ya Ujenzi wa Jengo la Halmashauri.