Kampeni ya Ugawaji vyandarua bila malipo yazinduliwa Chalinze

Imewekwa: July 10th, 2025

Na John Mlyambate, Chalinze

Mkuu wa Wilaya ya Bagamoyo na Mwenyekiti wa Kamati ya Afya ya Msingi ya Wilaya, Mheshimiwa Shaibu Ndemanga, amezindua rasmi kampeni ya uhamasishaji wa ugawaji wa vyandarua kwa kaya bila malipo katika Halmashauri ya Wilaya ya Chalinze, mkoani Pwani. Uzinduzi huo umefanyika wakati wa kikao cha Kamati ya Afya ya Msingi ya wilaya kilichojumuisha wajumbe mbalimbali wa sekta ya afya.

Akizungumza wakati wa kikao hicho, Mheshimiwa Ndemanga aliwataka wajumbe hao kuhakikisha jamii inahamasishwa ipasavyo ili kujitokeza kwa wingi katika zoezi la kujiandikisha kwa ajili ya kupata vyandarua hivyo. Alisisitiza kuwa ugonjwa wa malaria bado ni tatizo kubwa katika maeneo mengi, hivyo ushiriki wa wananchi ni muhimu katika kuhakikisha wanajikinga kupitia matumizi ya vyandarua.

Wataalam wa afya kutoka Wizara ya Afya pamoja na Ofisi ya Rais – TAMISEMI walitumia kikao hicho kuwasilisha mipango ya serikali katika kudhibiti malaria, ikiwemo kampeni kabambe ya kugawa vyandarua bila malipo kwa kila kaya kulingana na idadi ya watu waliopo.

Dkt. Peter Gitani kutoka Wizara ya Afya, akiwasilisha mada yake, alieleza kuwa malaria bado ni moja ya changamoto kubwa za kiafya nchini Tanzania. Alibainisha kuwa serikali imeweka mkakati madhubuti wa kuhakikisha kila kaya inapokea vyandarua bora vya kujikinga na mbu waenezao malaria.

Kwa mujibu wa Dkt. Gitani, katika Halmashauri ya Wilaya ya Chalinze pekee, serikali inatarajia kugawa vyandarua 198,101 kwa makisio ya awali. Alieleza kuwa kabla ya zoezi la ugawaji kuanza, watendaji wa vijiji watapatiwa mafunzo maalum kuhusu namna bora ya kuandikisha na kugawa vyandarua hivyo kwa ufanisi.

Alisisitiza kuwa ushiriki wa viongozi wa kijiji, watendaji wa kata, pamoja na kamati za afya ni muhimu ili kuhakikisha mchakato huo unakwenda kwa uwazi na mafanikio, huku lengo kuu likiwa ni kutokomeza kabisa ugonjwa wa malaria nchini.

Kampeni hii ya uhamasishaji na ugawaji wa vyandarua inatekelezwa kitaifa lakini kwa sasa imeanza rasmi katika Mkoa wa Pwani, ikiwa ni sehemu ya mkakati wa serikali kufikia Tanzania isiyo na malaria ifikapo mwaka 2030.