KEDA Yakabidhi Madarasa Mawili na Ofisi Pingo

Imewekwa: March 10th, 2022

Mkurugenzi wa Kiwanda cha kutengeneza Vigae cha KEDA kilichopo katika kitongoji cha Pingo ndani ya Mamlaka ya Mji Mdogo wa Chalinze,Bwana Bruce Ni jana amekabidhi vyumba viwili vya madarasa na Ofisi , vilivyojengwa na kukamilika katika shule ya Msingi Pingo ili kuboresha mazingira ya kufundishia na kujifunzia.

Vyumba hivyo vya Madarasa  na Ofisi ya walimu vimejengwa kwa ushirikiano wa nguvu za wananchi, Mfuko wa Jimbo na Kiwanda cha KEDA,hivyo kugharimu kiasi cha fedha za kitanzania Milioni Hamsini na Mbili(52).

Katika hotuba yake ya kukabidhi madarasa hayo Mkurugenzi wa KEDA aliahidi kuendelea kuboresha mazingira ya kufundishia na kujifunzia ili kuweza kuinua kiwango cha ufaulu cha wanafunzi katika Halmashauri ya Chalinze.

Kwa upande wake Mgeni rasmi katika hafla hiyo Kaimu Mkurugenzi wa Halmashauri ya Chalinze Bwana Archanus Kilaja kawa niaba ya Halmashauri amewashukuru wadau wote walioshiriki katika ujenzi wa madarasa hayo kwa maana ya wananchi,Ofisi ya Mbunge na Kiwanda cha KEDA kwa kufanya majukumu ambayo ni wajibu wa serikali katika kuboresha miundombinu ya Elimu na kuzidi kuwaomba waendelee na moyo wa kuboresha mazingira kama wawekezaji na wadau wa maendeleo katika halmashauri ya Chalinze.

“Asanteni sana kwa kutekeleza majumu ambayo ni wajibu wa serikali, endeleeni na moyo huo katika kuboresha miundombinu katika sekta zingine pia za maendeleo.” Kilaja alisema.

Mgeni rasmi baada ya hotuba yake na kukubali kupokea mradi huo kwa niaba ya Halmashauri alikabidhi  Cheti(Certificate of appreciation) cha kutambua Mchango wa KEDA katika ujenzi wa madarasa hayo ndipo akapokea madarasa hayo.

Kwa upande wake Diwani wa kata ya Pera Mheshimiwa Jackson Mkango kwa niaba ya wananchi wa Pingo na Pera kwa ujumla aliungana na mgeni rasmi kuwashukuru wadau wote walioshiriki katika ujenzi wa madarasa hayo na kuwataka waendelee kuwa na moyo wa uzalendo katika kuboresha huduma za jamii. “Napenda kuwashukuru wananchi wangu wa Pingo kwa kuanzisha ujenzi wa madarasa haya pia Ofisi ya Mbunge kwa kuchangia katika ujenzi huo na baadaye KEDA wamekamilisha ujenzi, endeleeni kuwa na moyo huo nyie kama jirani zetu.” Mkango alisema.