Kikao cha kamati ya lishe robo ya tatu chafanyika Chalinze

Imewekwa: November 12th, 2025

Kamati ya Lishe ya Halmashauri ya Wilaya ya Chalinze imefanya kikao chake cha robo ya kwanza ya mwaka wa fedha 2025/2026 katika ukumbi wa mikutano wa Halmashauri. Kikao hicho kimeongozwa na Mwenyekiti wa Kamati ambaye pia ni Mkurugenzi Mtendaji wa Halmashauri, Bwana Ramadhani Possi.

Katika kikao hicho, wajumbe walipokea na kujadili taarifa mbalimbali za utekelezaji wa mkataba wa lishe kutoka idara mbalimbali zinazohusika moja kwa moja na masuala ya lishe. Idara hizo ni pamoja na Elimu ya Msingi, Elimu ya Sekondari, Kilimo, Mifugo na Uvuvi, Maendeleo ya Jamii, Ustawi wa Jamii, RUWASA na DAWASA.

Wakati wa majadiliano hayo, wajumbe walibainisha mafanikio yaliyopatikana katika kipindi cha robo husika, ikiwemo kuendelea kwa juhudi za utoaji wa elimu ya lishe kwa jamii, uboreshaji wa chakula mashuleni na kuhamasisha kilimo cha mazao yenye virutubishi bora. Hata hivyo, changamoto kadhaa ziliainishwa ikiwemo upungufu wa bajeti na uelewa mdogo wa baadhi ya wanajamii kuhusu lishe bora.

Kamati hiyo imeazimia kuendelea kusimamia utekelezaji wa mkataba wa lishe kwa ukaribu zaidi kupitia ufuatiliaji wa mara kwa mara na kutoa mrejesho wa utekelezaji kwa idara husika. Aidha, imesisitiza umuhimu wa ushirikiano kati ya wadau wote wa lishe katika kuhakikisha watoto na jamii kwa ujumla wanapata lishe bora.

Bwana Ramadhani Possi ametoa wito kwa idara zote zinazotekeleza mkataba wa lishe kuhakikisha zinazingatia kikamilifu malengo yaliyowekwa katika mpango wa lishe wa Halmashauri. Ameeleza kuwa suala la lishe ni ajenda mtambuka inayohitaji jitihada za pamoja ili kufikia maendeleo endelevu katika afya na ustawi wa wananchi wa Chalinze.