Kikao cha Tathmini ya Mkataba wa lishe chafanyika Chalinze

Imewekwa: November 21st, 2025

Na John Mlyambate 

Kikao cha tathmini ya utekelezaji wa Mkataba wa Lishe kwa robo ya kwanza ya mwaka wa fedha 2025/26 kimefanyika leo katika Ukumbi wa Masafa ndani ya Halmashauri ya Wilaya ya Chalinze. Kikao hicho kililenga kufanya mapitio ya hatua mbalimbali zilizotekelezwa katika kuboresha lishe kwa wananchi wa Halmashauri hiyo.

Mheshimiwa Shaibu Ndemanga, ambaye ni Mwenyekiti wa Kamati ya Lishe ya Halmashauri, ndiye aliyeongoza kikao hicho. Katika uongozi wake, alisisitiza umuhimu wa kuchunguza kwa kina taarifa zote ili kujiridhisha na hatua zilizochukuliwa katika kipindi hicho.

Kikao kilihudhuriwa na Watendaji wa kata zote 15 za Halmashauri ya Wilaya ya Chalinze pamoja na wataalam kutoka idara mbalimbali za Halmashauri. Ushiriki huo mpana ulitoa fursa ya kupata mitazamo tofauti kuhusu utekelezaji wa mkataba wa lishe.

Katika majadiliano hayo, wajumbe walipokea na kupitia taarifa ya utekelezaji wa mkataba wa lishe kwa robo ya kwanza. Taarifa hiyo ilijadiliwa kwa kina na kutoa mwanga kuhusu maeneo yaliyofanya vizuri na yale yanayohitaji maboresho.

Miongoni mwa mambo muhimu yaliyosisitizwa ni kuhakikisha kuwa kila shule inakuwa na shamba la vyakula lishe. Hatua hii ina lengo la kuimarisha upatikanaji wa chakula chenye virutubisho kwa wanafunzi na hivyo kuboresha utekelezaji wa mkataba wa lishe kwa ujumla.

Mwenyekiti wa kikao, Mheshimiwa Ndemanga, aliwataka wajumbe kutoka kata zote kuendelea kuhamasisha wananchi kuhusu umuhimu wa ufugaji wa wanyama wadogowadogo kama kuku na bata pamoja na kilimo cha mbogamboga. Alibainisha kuwa shughuli hizo ni msingi muhimu wa kuboresha lishe katika kaya za wananchi wa Chalinze.

Aidha, kikao kilipokea taarifa ya utekelezaji wa shughuli za ustawi wa jamii kwa robo ya kwanza iliyowasilishwa na Afisa Ustawi wa Jamii wa Halmashauri, Bi. Atuganile Chisunga. Wajumbe waliipitia taarifa hiyo na kuipongeza kwa utekelezaji mzuri wa shughuli zilizopangwa.

Kwa kauli moja, wajumbe waliijadili na kuipitisha taarifa hiyo pamoja na shughuli zote za ustawi wa jamii zilizotekelezwa katika robo ya kwanza, hatua inayodhihirisha dhamira ya Halmashauri ya Chalinze kuboresha huduma kwa wananchi wake.