Kikwete aipongeza benki ya NMB

Imewekwa: October 7th, 2018

Na. John Mlyambate,Chalinze

Mbunge wa jimbo la Chalinze wilaya ya Bagamoyo mkoani Pwani Ridhiwani Kikwete ameipongeza Benki ya Nmb kwa juhudi zao za kutoa misaada kwa jamii ili kutatua changamoto mbalimbali zinazokuwa zikiwakabili wanajamii.

Akitoa pongezi hizo jana, katika kata ya kiwangwa alipokuwa akipokea vifaa tiba mbalimbali  vilivyotolewa na benki hiyo kwa ajili ya Zahanati ya Kiwangwa,Ridhiwani alisema kuwa swali zahanati hiyo ilikuwa na changamoto ya vitanda kwa ajili ya kinamama kuweza kujifungulia lakini kutokana na msaada huo tatizo hilo limebaki kuwa ni historia .

“Naipongeza benki ya Nmb kwa kutambua thamni ya kinamama wa chalinze ingawa katika nchi yetu kuna changamoto nyingi sehemu zingine lakini nyie mmeamua kutuletea msaada huu katika halmashauri yetu ya Chalinze”Alisema Ridhiwani

“Mimi nawatia moyo tu kwa niaba ya wananchi wa Chalinze msichoke kutusaidia kwani mahitaji yetu bado ni mengi ingawa nasi kama serikali tunapambana ili kuhakikisha kinamama wanajifungua bila matatizo ya aina yeyote hivyo ndiyo maana hata vifo vya kinamama wajawazito vinazidi upungua na kubaki kuwa historia”Mbunge alisisitiza.

Aliongeza kuwa awali walikuwa wanakabiliwa na tatizo la ukosefu wa vitanda kwa ajili ya akinamama kujifungulia katika zahanati hiyo lakini Nmb imewapatia vitanda 10 kwa ajili ya kupunguza tatizo hilo hivyo amewataka wananchi wa kata hiyo kwa kushirikiana na watumishi wa zahanati hiyo kuhakikisha wanavilinda vifaa hivyo ili viweze kuwasaidia kwa kipindi kirefu.

Kwa upande wake Mganga mkuu wa halmashauri ya Chalinze Dkt. Rahim Hangai alisema kuwa kipindi cha nyuma kinamama walikuwa wanapoteza maisha yao wakati wa kujifungua kutokana na changamoto mbalimbali kwa sasa ni wastani wa mama mmoja hupoteza maisha kwa mwaka kati ya  akinamama laki moja wanaojifungua hii ni hatua kubwa sana katika halmashauri yetu ya Chalinze.Alisema.

Aidha Dkt. Hangai alisema kuwa vifaa hivyo vimekuja kwa muda muafaka kutokana maombi yetu ilikuwa ni kupata vifaa na Nmb wametuletea hivyo vifo vinavyotokana na uzazi itabaki kuwa historia kwa halmashauri ya Chalinze. "Natoa maagizo kwa watumishi wa idara ya afya katika halmashsuri ya chalinze kila mmoja kwa nafasi yake afanye kazi kwa bidii na kwa kuzingatia maadili ya kazi yake ili kuokoa maisha ya mama na mtoto ili Chalinze tumalize tatizo hili kama siyo kupunguza."‎Hangai alisema.

Naye Meneja wa Benki ya Nmb wilaya ya Bagamoyo Bi, Bertha Mungure alisema kuwa benki hiyo imetoa msaada wa vifaa mbalimbali katika jimbo la Chalinze, vyenye thamani ya shilingi ya milioni kumi kwa lengo la kutoa faida wanazozipata kwa jamii ili kuisaidia serikali baadhi ya changamoto zinazokuwa zikiwakabili wananchi.

Aliongeza kuwa benki hiyo itaendelea kutoa misaada mbalimbali kwa kipindi chote kwani kwa kipindi hiki benki imetenga fedha nyingi za kusaidia katika jamii ili kuweza kulipa fadhila kwa wateja wake.

“Vifaa vilivyotolewa ni vitanda vya kujifungulia 10,vitanda vya kawaida 6,magodoro 10,'delivery kit' 1 na Bm Mashine 6 vyote vikiwa na thamani ya fedha za kitanzania milioni 10”Alisema Meneja huyo.

Aidha amempongeza mbunge wa jimbo hilo kwa ushirikiano na benki hiyo kwa kuwahamasisha wananchi wake kufungua akaunti katika benki ya Nmb na kuachana na tabia ya kukaa na pesa ndani ya nyumba.