Maandalizi ya Maonyesho ya Nanenane kanda ya Mashariki yapamba moto

Imewekwa: July 29th, 2025

Na John Mlyambate 

Maandalizi ya maonyesho ya Nanenane katika Kanda ya Mashariki yameingia katika hatua za mwisho, ambapo maonyesho hayo yanatarajiwa kuanza rasmi tarehe 1 Agosti 2025 na kufikia kilele chake tarehe 8 Agosti 2025. Maonyesho hayo ambayo hufanyika kila mwaka yatajumuisha mikoa ya Morogoro, Pwani, Tanga na Dar es Salaam na yatafanyika katika Uwanja wa Maonyesho wa Mwalimu Julius Kambarage Nyerere, uliopo katika Manispaa ya Morogoro.

Kwa upande wa Halmashauri ya Wilaya ya Chalinze, maandalizi kwa ajili ya kushiriki maonyesho hayo yamekamilika kikamilifu. Halmashauri imehakikisha kuwa mazao mbalimbali ya mfano (vipando) na teknolojia mpya zinazohusiana na sekta za kilimo, mifugo na uvuvi zimeandaliwa kwa ajili ya kuwaelimisha wananchi na wadau mbalimbali watakaotembelea banda la Chalinze.

Aidha, Halmashauri ya Chalinze imesisitiza kuwa lengo la ushiriki wao ni kuhakikisha wananchi wanapata uelewa mpana wa mbinu bora za uzalishaji, usindikaji wa mazao, ufugaji wa kisasa pamoja na uvuvi wenye tija. Kupitia maonyesho haya, wakulima, wafugaji na wavuvi watajifunza njia mpya za kuongeza thamani ya mazao na bidhaa zao ili kuongeza kipato na kukuza uchumi wa kaya.

Vilevile, teknolojia mbalimbali za umwagiliaji, utunzaji wa ardhi na uhifadhi wa mazingira zitatolewa ili kuhakikisha wakulima na wafugaji wanaboresha tija bila kuathiri rasilimali asilia. Banda la Chalinze pia litakuwa na maafisa ugani, wataalam wa mifugo na wataalam wa uvuvi watakaotoa elimu ya moja kwa moja kwa wananchi watakaofika kujionea shughuli hizo.

Maonyesho ya Nanenane Kanda ya Mashariki mwaka huu yanatarajiwa kuvutia wadau wengi kutoka sekta za umma na binafsi. Halmashauri ya Wilaya ya Chalinze imewataka wananchi kujitokeza kwa wingi kutembelea banda lao ili kunufaika na teknolojia, maarifa na mbinu mpya zitakazowasaidia kuboresha shughuli zao za kilimo, mifugo na uvuvi kwa maendeleo endelevu ya uchumi wao na taifa kwa ujumla.