Mhe.Okash atoa wiki mbili kwa wafugaji kuondoka kwa wakulima

Imewekwa: June 14th, 2023

Mkuu wa Wilaya ya Bagamoyo Mhe. Halima Okash ametoa siku 14 na kuwataka Wafugaji wa Kata ya Msoga kuondoka na kutofanya Shughuli za Ufugaji katika maeneo ya Wakulima na kuahidi kuanza kufanya operesheni maalum ya kutokomeza migogoro ya wakulima na Wafugaji.

Ameyasema hayo hii leo katika Mkutano wa Hadhara uliofanyika katika Kata ya Msoga wakati wa muendelezo wa Ziara yake ya Kata kwa Kata.

“Nawapa wiki mbili Wafugaji wote wa Kata hii wanaolisha na kufanya shughuli za ufugaji katika maeneo ya wakulima waondoke katika maeneo hayo maramoja pamoja na hiyo ninapiga Marufuku uzururaji holela wa wa mifugo kwani ni huwezi kufanya shamba la Mkulima malisho ya Mifugo yako kwani hiyo inachangia kutia hasara na pia kwa mfugaji ambaye atakaidi mifugo yake itakayokamatwa itachinjwa na nyama zitagawiwa mashuleni.”Amesema Mhe.Okash.

Aidha Mhe. Okash amewataka Wakulima kutofanya shughuli za Kilimo katika maeneo yaliopangwa kwaajili ya wafugaji kwani pia kwa mkulima atakayeingilia maeneo ya Wafugaji hatua za Kisheria zitachukuliwa na hakutakuwa na malalamiko ambayo yatasikilizwa.

Hata hivyo aliendelea kwa kuwataka Wananchi kuacha tabia ya kuvamia maeneo (ardhi) ya Serikali  kiholela na pia kwa yeyote alkiyepewa Ardhi hiyo hana budi kutunza na kuilinda mipaka ya eneo lake.

Kwa upande Mwingine Mhe.Okash amewataka Wazazi kuwa Mstari wa mbele katika kuhakikisha wanalinda watoto dhidi ya ukatili na unyanyasaji wa kijinsia.

“Niwaombe Wazazi wenzangu tuwe mstari wa mbele katika kuhakikisha tunakuwa karibu na watoto wetu na kuwa na tabia ya kuzungumza na kuwafuatilia mienendo yao ya kila siku”.Amesema.

Nae Diwani wa Kata ya Msoga ambaye pia ni Mwenyekiti wa Halmashauri ya Wilaya ya Chalinze Mhe. Hassan Mwinyikondo amemshukuru Mkuu wa Wilaya huyo kwa ziara yake katika Kata hiyo kwani imewakumbusha kufanya kazi kwa bidi na kujua wajibu wao kama viongozi pamoja na Wananchi wa Msoga.