Mkurugenzi Kiwanuka aweka mikakati ya Ukusanyaji Mapato Chalinze

Imewekwa: December 8th, 2018

Mkurugenzi wa halmashauri ya wilaya ya Chalinze Bi Amina Kiwanuka ameitisha kikao kazi kwa maafisa watendaji wa kata na vijiji kwa malengo ya kuboresha mpango mkakati wa namna ya kuboresha ukusanyaji wa mapato ya halmashauri wilayani humo.

Katika kikao hicho kilichofanyika katika ukumbi wa halmashauri wakuu wa idara katika halmashauri wametoa miongozo mbalimbali ya namna ya ukusanyaji mapato na usimamizi wa sheria za utawala na sheria ndogo za halmashauri na uadilifu wa kukusanya mapato na kuziba mianya yote inayopelekea kuvuja mapato.

Kwa upande wa Mkurugenzi mtendaji wa halmashauri ya wilaya Bi Amina Kiwanuka amewataka watendaji wa kata na vijiji kuwa wasimamizi wakuu wa ukusanyaji mapato kwa kuhakikisha kuwa wanawatumia mawakala walio waaminifu na waadilifu na mawakala hawa wapatikane kupitia vikao halali vya kijiji na si vinginevyo,aliendelea kufafanua kwa kuwataka watendaji wa halmashauri kwa ngazi zote kubadilika na kuenenda kwa mujibu wa sheria taratibu na kanuni za nchi ili wasiingie kwenye migogoro ya kiutumishi,"badilikeni serikali ya awamu ya tano ni ya kazi si ya maneno na inahitaji watendaji wenye maadili."Kiwanuka alisisitiza.

Naye Mwanasheria wa halmashauri Bi Happyphania Luena aliwataka watendaji wa vijiji na kata kuzingatia sheria taratibu na kanuni kwa kuwaelekeza wananchi kupeleka malalamiko katika vyombo sahihi kwa mujibu wa sheria kwa maana ya mabaraza ya kata na mahakama na kuwataka watendaji kutojiingiza katika utatuzi wa migogoro iliyo nje ya uwezo wao, na kama kuna kuwa na mkanganyiko wa kisheria ni vema kupata ushauri wa kisheria kutoka ofisi ya Mkurugenzi na siyo kufanya maamuzi kinyume cha sheria na baadaye kusababisha migongano katika jamii.

Afisa Tehama,Bwana Simon Ihonde aliwataka watendaji kuwa makini katika utumiaji wa mashine za ukusanyaji mapato na Mara wanapobaini zina matatizo ni vema kutoa taarifa ofisi ya Tehama kwa usaidizi na utatuzi wa tatizo na kuwataka watendaji kuitumia tovuti ya halmashauri kwa upatikanaji wa taarifa mbalimbali za halmashauri na serikali kwa ujumla.

Afisa Mipango wa wilaya,Michael Mwakanjuki alitoa ufafanuzi wa namna ya matumizi ya fedha za mapato ya ndani ya kijiji kuwa asilimia 60 ya mapato itumike kwa miradi ya maendeleo na asilimia 40 itumike kwa matumizi mengineyo,katika hili zingatieni maelekezo haya katika utekelezaji wa majukumu yenu katika taasisi zenu.