Mkurugenzi Mtendaji Chalinze afungua mafunzo ya wanawake,vijana na watu wenye ulemavu

Imewekwa: September 26th, 2025

Na John Mlyambate

Mkurugenzi Mtendaji wa Halmashauri ya Wilaya ya Chalinze, Bwana Ramadhani Possi, leo amefungua rasmi mafunzo kwa wajasiriamali wanawake, vijana na watu wenye ulemavu waliokidhi vigezo vya kupata mikopo inayotokana na asilimia kumi ya mapato ya ndani ya halmashauri hiyo. Mafunzo haya ni sehemu ya utekelezaji wa sheria inayoweka masharti ya kutenga sehemu ya mapato ya ndani kwa ajili ya kuwainua kiuchumi wananchi kutoka makundi maalum.

Mafunzo hayo yameandaliwa kwa lengo la kuwajengea uwezo walengwa katika masuala ya ujasiriamali, usimamizi wa fedha na uendeshaji wa biashara. Wawezeshaji kutoka sekta mbalimbali ikiwemo sekta ya fedha, biashara, kilimo na maendeleo ya jamii wanatarajiwa kutoa mada muhimu zitakazosaidia washiriki kuboresha mbinu zao za kibiashara na kuhakikisha kuwa mikopo watakayopata inaleta tija.

Akizungumza wakati wa ufunguzi, Mkurugenzi Possi amesisitiza umuhimu wa washiriki kuwa makini wakati wa kupokea mafunzo hayo. Ameeleza kuwa elimu watakayoipata ndiyo msingi wa mafanikio yao katika matumizi ya mikopo na kwamba ni wajibu wa kila mshiriki kuhakikisha fedha wanazokopeshwa zinatumika kwa uadilifu ili biashara zao ziwe endelevu.

Kwa mujibu wa Mkuu wa Idara ya Maendeleo ya Jamii, Bi Nyamayao Said, jumla ya washiriki zaidi ya 400 wameshiriki katika mafunzo hayo. Hawa ni kutoka makundi ya wanawake, vijana na watu wenye ulemavu ambao wote wamekidhi masharti ya kupata mikopo kutoka halmashauri. Bi Nyamayao alieleza kuwa mafunzo haya ni sehemu ya maandalizi muhimu kabla ya utoaji rasmi wa mikopo hiyo.

Aidha, Bi Nyamayao alibainisha kuwa mbali na elimu ya ujasiriamali, washiriki pia watafundishwa mbinu za kujenga nidhamu ya kifedha, namna ya kutunza kumbukumbu za biashara na namna ya kujenga mitandao ya masoko kwa bidhaa au huduma watakazozalisha. Mafunzo hayo yatachukua muda wa siku kadhaa kabla ya zoezi la utoaji wa mikopo kuanza rasmi.

Mkurugenzi Possi amewahakikishia washiriki kuwa halmashauri itaendelea kuwa bega kwa bega nao hata baada ya mikopo kutolewa kwa kuhakikisha wanapata ushauri wa kitaalamu na ufuatiliaji wa maendeleo ya miradi yao. Ameeleza kuwa dhamira ya halmashauri ni kuona wananchi wake wanainuka kiuchumi kupitia mpango huu.

Mafunzo hayo ni sehemu ya jitihada za serikali za kuwainua wananchi kiuchumi kupitia uwezeshaji wa moja kwa moja kwa makundi maalum, na yanatarajiwa kuleta mabadiliko chanya katika maisha ya washiriki na jamii zao kwa ujumla. Halmashauri ya Wilaya ya Chalinze inatarajia kuwa mfano wa kuigwa katika utekelezaji wa mpango huu wa kitaifa wa utoaji wa mikopo kwa wanawake, vijana na watu wenye ulemavu.