Mkuu wa Wilaya ya Bagamoyo awataka Wachimbaji Kuzingatia Sheria

Imewekwa: November 1st, 2022

Mkuu wa wilaya ya Bagamoyo, Mheshimiwa Zainabu Abdallah amewataka wachimbaji wa madini wilayani Bagamoyo kwa maana ya Bagamoyo na Chalinze kuzingatia sheria za nchi katika uchimbaji wa madini kwa kuheshimu sheria za Ardhi,Madini na Mazingira. Maagizo hayo ameyatoa leo katika kikao cha wadau wa madini kilichofanyika leo katika ukumbi wa Jakaya Kikwete katika halmashauri ya Chalinze.

Aidha Mkuu wa wilaya ametoa tahadhari kwa wachimbaji wa madini ujenzi kuwa si kila eneo linafaa kwa uchimbaji na hata kama wanapata leseni za uchimbaji sharti wanatakiwa kuripoti ofisi za wakurugenzi na kupewa vibali kama maeneo husika yanafaa kwa uchimbaji kwa mujibu wa sheria ya Mazingira.

Naye Mwenyekiti wa Halmashauri ya wilaya ya Bagamoyo amewaasa wachimbaji katika mkutano huo kuzingatia sheria katika uchimbaji wa madini ili kusiwe na uharibifu wa mazingira.

Kwa upande wake Mwenyekiti wa Halmashauri ya wilaya ya Chalinze,Mheshimiwa Hassani Mwinyikondo ametoa pongezi kwa Mkuu wa wilaya ya Bagamoyo kwa kuitisha mkutano wa wadau wa madini kwa misingi ya kuhamasisha ukusanyaji wa mapato ya ndani katika halmashauri ya Chalinze na kuwapongeza wataalam wa madini kwa utoaji elimu ya namna ya uchimbaji bora wa madini kwa misingi ya sheria.

Mkuu wa wilaya katika majumuisho yake amewataka wawekezaji katika halmashauri za Bagamoyo na Chalinze kulipa kodi na ushuru mbalimbali pasipo kukwepa kwani kipaumbele cha serikali ya awamu ya sita ni kukusanya mapato.