Mwenyekiti wa halmashauri ya Chalinze azindua kampeni ya chanjo ya polio

Imewekwa: September 1st, 2022

Mwenyekiti wa Halmashauri ya wilaya ya Chalinze,Mheshimiwa Hassani Mwinyikondo kwa niaba ya Mkuu wa wilaya amezindua rasmi zoezi la chanjo ya ugonjwa wa polio kiwilaya,uzinduzi huo umefanyika leo katika hospitali ya Wilaya Msoga.

Uzinduzi huo umefanywa na Mwenyekiti wa Halmashauri akiwa na wajumbe wote wa kamati ya Afya ya Msingi ya Wilaya kwa kutoa chanjo kwa watoto wote walio chini ya miaka mitano.

Katika hotuba yake baada ya uzinduzi wa zoezi hilo la  chanjo Mwinyikondo aliwataka wananchi wa Chalinze katika kata zote kumi na tano (15) kuwapeleka watoto wao katika vituo vya afya na zahanati ili huduma hiyo muhimu kwa misingi ya kutekeleza adhima ya Serikali ya awamu ya sita chini Rais Samia Suluhu Hassan kuwanusuru watoto wote walio chini ya miaka mitano na ugonjwa hatari wa polio.

 “ Wananchi wenzangu tuunge mkono jitihada za Serikali yetu yenye nia njema na watu wake kwa kuhamasishana sisi kwa sisi kuwapeleka watoto wetu kuchanjwa ili kuwaepusha watoto wetu na ulemavu usio kuwa na sababu na hatimaye waje kuwa viongozi na watenda kazi wa taifa letu.” Mwinyikondo alisema.

Naye Mkurugenzi Mtendaji wa Halmashauri ya wilaya ya Chalinze,Bwana Ramadhani Possi alitoa wito kwa wananchi kushiriki kikamilifu katika awamu hii ya Tatu ya chanjo ya polio ili kuwakinga watoto wote walio chini ya miaka mitano na ugonjwa wa polio unaoweza kuwasababishia ulemavu au vifo visivyokuwa na sababu na wakati kinga ipo.

    “Kama Halmashauri tumejipanga watoto wote waliona na umri wa chini ya miaka mitano wanafikiwa na kuchanjwa na kwa awamu hii ya Tatu tumelenga kuchanja jumla ya watoto 50,877 alekwa kata zote kumi na tano (15) katika Halmashauri ya wilaya ya Chalinze na tunategemea kuvuka malengo kutokana na mikakati tuliyojiwekea ya nyumba kwa nyumba.” Possi alieleza.

Kwa upande wake Mratibu wa Chanjo wilaya Bwana Aidan Mbulinyingi alitoa wito kwa wananchi kujitokeza kwa wingi ili kuvuka malengo kama ilivyokuwa awamu ya pili ya chanjo ya polio,malengo yalikuwa ni kuchanja watoto 42,000 laki Halmashauri iliweza kuvuka malengo na kuchanja jumla ya watoto 50,877 sawa na asilimia 120.

Mbulinyingi aliwataka viongozi wa vitongoji,vijiji,kata,tarafa na ngazi ya Halmashauri kuwa wahamasishaji wakuu ili kila mtoto aliyechini ya miaka mitano anapata chanjo dhidi ya polio ili tuwe na jamii yenye siha njema.