Ridhiwani:Umiliki wa Ardhi Kisheria Suluhisho la Migogoro Nchini

Imewekwa: March 8th, 2022

NAIBU Waziri Ardhi Nyumba na Maendeleo ya Makazi Ridhiwani Kikwete amesema ili kuondokana na migogoro ya ardhi ni vema kila mwananchi ahakikishe ana hati miliki ya eneo lake.

Ridhiwani aliyasema hayo jana alipokuwa akizungumza na wananchi wa Vijiji vya Kwamsanja, Kwamduma na Kwakonje ambapo wananchi walimuelezea kuhusiana na migogoro isiyoisha inayosababisha kutokuwa na maendeleo.

Alisema kero ya migogoro ya ardhi imekuwa ikielezewa na wananchi katika maeneo mbalimbali aliyopita na muarobaini wa tatizo hilo ni kuwa na hati miliki ambayo itakuwa inaelezea mipaka ya kila mmoja pamoja na vijiji.

"Wenyeviti hakikisheni wananchi wanapimiwa maeneo wanakuwa na hati miliki ili kuondoa hii migogoro ya mara kwa mara, simamieni pia vijini vyenu vihakikiwe mipaka yake itasaidia kufanya shughuli nyingine za maendeleo badala ya kila siku kufanya usuluhishi" alisema.

Kuhusiana na suala la mifugo kuharibu mazao ya wakulima Rishiwani aliwataka watendaji kusimamia sheria ndogo zinazotungwa na baraza la Madiwani ili kukomesha hali hiyo.

Ofisa  Ardhi wa Halmashauri ya Chalinze Musa Kichumu aliahidi kushughulikia maagizo ya Naibu Waziri huyo huku akiwataka wananchi kuheshimu mpango wa matumizi bora ya ardhi ambao kila mmoja ametengewa eneo lake kwa jamii ya wafugaji na wakulima.

Aidha alieleza kuwa  kuwa ipo haja ya elimu kwa wananchi kuhusiana na mpango wa matumizi bora ya ardhi ili wasisitizwe kuzingatia mipango hiyo kuepuka migogoro ya mara kwa mara.

Ofisa Mifugo wa Halmashauri ya Chalinze Msongo Songoro alisema kuwa ipo sheria imepitishwa na Madiwani ambayo inasubiri Waziri wa Tamisemi kusaini na itakapoanza kila ng'ombe atakayekutwa kwenye eneo ambalo haliruhusiwi kisheria atatozwa sh.50,000 kwa kila ng'ombe mmoja.

Songoro alisema sheria  hiyo ni kati ya zilizotungwa na Halmashauri kuondoa migoro kwenye baadhi ya maeneo ya Halmashauri hiyo  mingi ikihusishwa wafugaji wanaolalamikiwa kulisha mifugo kwenye mashamba ya wakulima.

Ofisa Mifugo huyo pia aliwataka wazazi kuwalea watoto wao kwa kufuata maadili ili kuepuka kushiriki kwenye wizi wa mifugo ambao nao unaelezwa kutokea kwenye vijiji huku wanaotajwa kuhusika wakiwa ni Vijana.

 Wakizungumza katika mikutano tofauti iliyofanywa na Naibu Waziri  huyo ambaye pia ni Mbunge wa jimbo la Chalinze Ridhiwani Kikwete, walimueleza kuwa wanashindwa kufanya shughuli za kimaendeleo kutokana muda mwingi kutumia wakisuluhisha migogoro.

Ramadhani Mtui na Juma Chambila wakazi wa Kibindu walieleza kuwa kwenye baadhi ya mashamba yao wanashindwa kuendesha shughuli za kilimo kutokana na jamii ya wafugaji kulisha mifugo kwenye mashamba yao.

Mtui aliiomba Serikali kuingilia kati kwani kuna hatari ya kukumbwa na baa la njaa kwa jamii ya wakulima endapo hakutakuwa na udibiti wa mifugo kwenye maeneo ya kilimo.

Katika kijiji cha Kwakonje wananchi waliomba kuwepo kwa kituo cha polisi kudhibiti matukio yanayodaiwa kufanywa na jamii ya wafugaji ambao wanashindwa kukamatwa na kufikishwa kwenye vyombo vya sheria.