Sayona yatoa vifaa tiba vyenye thamani ya milioni 5

Imewekwa: October 23rd, 2018

Kampuni ya uzalishaji vinywaji vya matunda ya Sayona Fruits imetoa vifaa tiba vyenye thamani ya Fedha za kitanzania Milioni 5 katika zahanati ya kijiji cha Magulumatali,ikiwa ni kuunga mkono juhudi za serikali ya awamu ya tano katika kuboresha huduma za afya kwa wananchi.

Katika hafla ya makabidhiano ya vifaa tiba hivyo iliyofanyika katika kijiji cha Magulumatali jana na kushuhudiwa na viongozi wa kata ya Talawanda wakiongozwa na Diwani wa kata hiyo ambaye pia ni Mwenyekiti wa halmashauri ya wilaya ya Chalinze ,Mheshimiwa Saidi Zikatimu,vifaa hivyo vimekabidhiwa na Mwakilishi wa kampuni hiyo ambaye pia ni Afisa Uhusiano wa kampuni Bwana Abubakari Mlawa.

Katika makabidhiano hayo Afisa Uhusiano wa kampuni ya Sayona amesema utoaji wa misaada ni moja ya jukumu lao kwa mujibu wa sheria kama wawekezaji ndani ya halmashauri ya Chalinze na kuahidi kuendelea kutoa huduma kwa wanajamii. Mlawa aliendelea kufafanua kuwa kampuni yake imekuwa ikisaidia kuboresha miundombinu mbalimbali ya huduma za Jamii kama maji,Elimu,afya na barabara na kuwataka wananchi kuanzisha miradi mbalimbali kutokana na vipaumbele vyao na kampuni itakuwa ikisaidia ukamilishaji wa miradi hiyo kutoka na hali ya uzalishaji wa kiwanda na faida inayopatikana.

Kwa upande wake Diwani wa kata ya Talawanda na mwenyekiti wa halmashauri ya Chalinze Saidi Zikatimu aliishukuru kampuni ya Sayona Fruits kwa jinsi inavyounga mkono juhudi za serikali katika utoaji huduma kwa Jamii kwa kuboresha miundombinu ya huduma za Jamii na kuwataka wawekezaji wengine katika halmashauri ya Chalinze kuiga mazuri yanayofanywa na kampuni ya Sayona Fruits kwani kampuni hii imekuwa na uzalendo wa kweli katika kutekeleza majukumu yake kwa wananchi.

Hata hivyo Mwenyekiti wa kijiji cha Magulumatali, Bwana Ramadhani Biga aliishukuru kampuni ya Sayona kwa kuwajali wananchi wa Magulumatali na kusema kutokana na vifaa tiba hivyo kupatikana zahanati yetu itaanza kufanya kazi mara moja na wananchi hawataenda mbali kutafuta matibabu kama ilivyokuwa awali.