Wajumbe wa mabaraza ya Kata Chalinze wapata mafunzo

Imewekwa: November 12th, 2018

Kitengo cha Sheria katika halmashauri ya wilaya ya Chalinze kimetoa mafunzo ya kuyajengea uwezo mabaraza ya kata tisa kati ya kumi na tano kuhusu sheria  na taratibu  zinazoongoza mabaraza ya kata kwa mujibu wa sheria ya Mabaraza ya kata namba 7 ya mwaka 1985.

Mafunzo hayo yametolewa katika robo ya kwanza ya mwaka wa fedha 2018/2019 kwa wajumbe wapatao 72 na watendaji wa kata 9. Kata zilizopata mafunzo hayo ni kata za Msata,Mandera,Kiwangwa,Miono,Msoga,Lugoba,Bwilingu,Pera na Vigwaza.

     Mafunzo hayo ni kwa ajili ya wajumbe wote wa mabaraza la kata pamoja na watendaji wa kata ili kuwajengea uwezo wajumbe wote pamoja na watendaji juu ya sheria,taratibu na miongozo mbalimbali inayotumika katika kuyaongoza mabaraza ya kata. Kwa mujibu wa Mwanasheria wa halmashauri Bi. Happyphania Luena, alitoa ufafanuzi kwa kueleza walichojifunza wajumbe wa mabaraza ya kata ni pamoja na maana ya mabaraza ya kata,sheria za mabaraza ya kata,mabaraza ya kata na mashauri ya ardhi,muundo wa mabaraza hayo,namna wanavyopatikana wajumbe na sifa zao,ukomo na mamlaka ya baraza la kata  na rufaa na marejeo dhidi ya maamuzi ya baraza la kata

.Mwanasheria wa halmashauri alifafanua kwa kueleza kuwa ,lengo la halmashauri ni kutoa mafunzo kwa mabaraza yote ya kata na kwa kata sita zilizobaki watapata mafunzo kwa robo ya pili ya mwaka wa fedha wa 2018/2019

   Naye Mwenyekiti wa halmashauri ya wilaya ya Chalinze, Saidi Zikatimu akizungumza na waandishi wa tovuti ya halmashauri kuhusu mafunzo ya kuwawezesha wajumbe wa mabaraza ya kata aliipongeza ofisi ya Mkurugenzi Mtendaji kupitia kitengo cha sheria kwa hatua za makusudi walizochukua kutoa elimu ya namna ya kuendesha mabaraza hayo,na kusema kuwa kuyawezesha mabaraza ya kata ni chanzo cha kuondoa migogoro mbalimbali ya ardhi na kutolewa ufumbuzi usiokuwa na mashaka kwa kutoa uamuzi au hukumu stahiki kwa wananchi wanaobishania juu ya haki zao, utatolewa kwa misingi ya sheria taratibu na kanuni kwa kuzingatia sheria ya mabaraza ya kata na si vinginevyo.

   Aidha Mheshimiwa Zikatimu aliendelea kufafanua kuwa endapo mabaraza hayo yatafanya kazi kwa umakini na weledi yatapunguza msongamano wa mashauri katika Baraza la ardhi na nyumba wilaya kwani rufaa zinaweza kupungua kama siyo kwisha kabisa."Elimu hii kama itatumika ipasavyo itakuwa msaada hata kwa mabaraza ya ardhi ya vijiji katika utoaji hukumu na maamuzi mbalimbali na itapendeza Elimu hii ikitolewa hata katika halmashauri za vijiji kwa halmashauri ya Chalinze ili kuboresha utawala wa sheria."Zikatimu alisema.