Walimu wa kike wa Shule za Sekondari 22 wapewa mafunzo ya stadi za maisha na elimu ya fedha

Imewekwa: March 10th, 2022

Halmashauri ya Wilaya ya Chalinze ikishirikiana na Shirika lisilo la kiserikali la “Room to read” hii leo imeanza mafunzo maalumu ya stadi za maisha na elimu ya fedha kwa walimu wa kike katika shule 22 za sekondari ikiwa kila shule imetoa mwalimu mmoja wa kike kama mwakilishi wa shule yake.

Mafunzo hayo yanayofanyika katika ukumbi wa mikutano wa Halmashauri ya Wilaya ya Chalinze ni miongoni mwa mradi mkubwa unaofanywa na shirika la “Room to Read” ambao unaitwa mradi wa nguvu ya msichana  ukiwa na lengo la kuwapa mafunzo ya stadi za maisha na elimu ya fedha walimu wa kike wa shule za sekondari zilizopo katika Halmashauri hii na kwenda kuyatumia kuwezesha wanafunzi waliopo katika shule zao.

Akizungumzia malengo ya mradi huu mratibu wa mafunzo hayo ndugu Abdourlahman Banza amesema mradi wa nguvu ya msichana ni mradi ulio na mafanikio makubwa hasa kwa Halmashuri ya Wilaya Chalinze na umelenga katika kuwafanya wasichana wa shule za sekondari waweze kubaki shuleni na kupata stadi za msingi za kuwawezesha kufanya maamuzi sahihi katika maisha yao ya sasa na ya Baadaye.

“Mradi wetu wa nguvu ya msichana ambao umejikita katika kutoa mafunzo kuhusu stadi za maisha na elimu ya fedha kwa msichana na kijana aliyepo shuleni umelenga kumsaidia kijana na mtoto wa kike kutatua changamoto mbalimbali zinazojitokeza katika maisha yake ya kawaida na kupata kizazi kinachoweza kujitetea, pia kumwezesha binti kujidhibiti na kufanya matumizi mazuri ya fedha pamoja na kuweza kujua misingi ya ujasiriamali na  Biashara.”Alisema Ndg. Abdourlahman Banza

Aidha Afisa mradi Bi Rehema Juakali aliongeza kwa kusema kuwa mradi huu ni ushirikiano baina ya Halmashauri ya Wilaya ya Chalinze pamoja na shirika la ‘Room to read’ umelenga kuwatumia walimu ili kuweza kuwafikishia wanafunzi waliopo katika shule zao.

“Mradi huu unaofanyika hapa Chalinze, unalenga kuwapa mafunzo walimu wawakilishi wa shule 22 ambao watapewa mafunzo na kuweza kuyafikisha nakuyawezesha kwa wanafunzi waliopo katika shule zao wanazofundisha ili elimu ya stadi za maisha na elimu ya fedha iweze kuwafikia wasichana wengi waliopo shuleni na vijana kwa ujumla”.Alisema Bi. Rehema.

Kwa upande wa washiriki wa mafunzo hayo Mwl. Husna Luvanga ambaye ni mwalimu wa shule ya sekondari Kikaro ameelezea namna mafunzo yanavyoendelea na jinsi gani anaamini mafunzo hayo yatawasaidia wanafunzi wa kikenaweza kutumia mafunzo aliyoyapata ili kuweza kuwawezesha wanafunzi wake elimu wanayoendelea kuipata.

“ Tunashukuru mafunzo yameanza vizuri na kiukweli mafunzo haya tunayopewa na wawezeshaji wetu ni mazuri na nina Imani tutakapowafikishia wananfunzi wetu wataelewa na kuyatumia vyema na pia naamini mpaka mwisho wa mafunzo haya tutakuwa tumepata kitu kikubwa kikubwa sana” Alisema Mwl.Husna.

Mafunzo hayo ya siku 6 ni matokeo ya ushirikiano na makubaliano baina ya Halmashauri ya Wilaya ya Chalinze pamoja na taasisi ya ‘Room to read’ ambapo yatawezesha kuibadilisha jamii hasa wasichana.