Wanafunzi wenye mahitaji maalumu wanufaika na mapato ya ndani kwa kupatiwa vitimwendo

Imewekwa: February 23rd, 2021

Halmashauri ya Chalinze imewapatia watoto wenye uhitaji maalumu vitimwendo ili viweze kuwasaidia katika kufikia ndoto zao za Elimu, hayo yamefanyika leo Tarehe 23. 02.2021 katika viwanja vya Ofisi za Halmashauri ya Wilaya ya Chalinze.

Akizungumza katika Hafla ya makabidhiano ya vitimwendo M/Kiti Wa Halmashauri Mh. Geofrey B. Kamugisha alisema “Lengo la serikali na Halmashauri kwa ujumla nikutambua na kusaidia watu wenye mahitaji maarumu ili wawezekufikia ndoto zao hasa za kupata elimu sawa na watoto wengine. Lengo ni kuhakikisha haki ya elimu inapatikana kwa kila mtoto pasipo kujali hali yake ya kiafya kama ni mwenye mahitaji maalumu au asiye na mahitaji maalumu”.

Aidha Mh. Kamugisha amewataka wazazi wa watoto walio kabidhiwa vitimwendo hivyo kuhakikisha watoto hao wanavitumia kwa lengo kusudiwa na kuvitunza ili viweze kuwasaidia kwa muda mrefu katika juhudi ya kufikia adhima yao ya kupata elimu, aliahidi kuendelea kutenga fedha kwenye bajeti kila mwaka wa fedha kwani kwa mwaka wa fedha 2018/2019 vitimwendo vilivyonunuliwa vilikuwa 24 na fimbo nyeupe 52 na mwaka wa fedha 2019/2020 vitimwendo 10 vimenunuliwa kwa ajili ya watoto waliopo Halmashauri ya Chalinze.

Akihitimisha mazungumzo yake katika hafla hiyo Mh. Kamugisha alimshukuru Mkurugenzi wa Halmashauri Mr. Ramadhani Possi na wataalamu kwa ujumla kwa kuendelea kufanya kazi kwa bidii na kuwasihi wazidishe uadilifu katika utendaji kazi wao ili kuifanya Chalinze izidi kung’aa katika Nyanja zote za maendeleo.