Wananchi wa Halmashauri ya Wilaya ya Chalinze wameendelea kushiriki kikamilifu katika maadhimisho ya Siku ya Afya na Mazingira ya Mwisho wa Mwezi

Imewekwa: November 29th, 2025

Wananchi wa Halmashauri ya Wilaya ya Chalinze wameendelea kushiriki kikamilifu katika maadhimisho ya Siku ya Afya na Mazingira ya Mwisho wa Mwezi kwa kufanya usafi katika maeneo mbalimbali ya wazi, mifereji ya maji ya mvua na kufyeka nyasi, kufuatia agizo la Mheshimiwa Rais Dkt. Samia Suluhu Hassan.

Maadhimisho hayo yamefanyika leo, Jumamosi tarehe 29/11/2025, ambapo zoezi hilo lilianza saa 12:00 asubuhi hadi saa 4:00 asubuhi. Maeneo yaliyofanyiwa usafi ni pamoja na maeneo ya biashara, taasisi zote, Soko la Bwilingu, Stendi Kuu na Round About. Kaulimbiu ya maadhimisho hayo ni “Mtu Ni Afya.”

Kutokana na ushiriki huo, Afisa Afya Msaidizi wa Halmashauri ya Wilaya ya Chalinze, Paulo Bujiku, amewashukuru na kuwapongeza wananchi wa Chalinze kwa ushirikiano mzuri walioutoa katika kukamilisha zoezi hilo.

Aidha, ametumia nafasi hiyo kutoa wito kwa wananchi kuendelea kushiriki kikamilifu katika zoezi hilo kila mwezi, kwa kuwa ni wajibu wa kila mmoja kutunza na kulinda mazingira, kwani mazingira ni afya.