Wataalamu wa Wizara ya Ardhi,Halmashauri na Asasi zisizo za kiserikali watoa mafunzo kwa kamati ya urasimishaji ardhi kitongoji cha Pera

Imewekwa: July 19th, 2023

Wataalamu kutoka wizara ya Ardhi Nyumba na Maendeleo ya Makazi,wataalamu wa halmashauri na Asasi za kiraia wamefika katika kitongoji cha Pera katika kata ya Pera  ili kuhamasisha na kutoa mafunzo kwa wajumbe wa kamati ya Mradi wa Uboreshaji usalama wa Milki za Ardhi (Land Tenure Improvement Project). Mradi huu ni mradi unaotekelezwa katika halmashauri ya wilaya ya Chalinze.

Wataalamu hao wamefika katika kitongoji hicho ili kuwajengea uwezo wajumbe wa kamati hiyo sanjari na kufahamu majukumu yao kama wajumbe wa kuwaunganisha wananchi na wataalamu watakaokuwa wakishughulika na kazi ya kupima na kurahisisha zoezi la urasimishaji. Akifafanua majukumu ya wanakamati Afisa Mipango Miji wa Halmashauri Bi Rogate Johnson aliwaeleza wajumbe hao majukumu yao ni pamoja na kuandaa mikutano ya wananchi,kuelimisha umma na kutatua migohoro kwa maeneo yatakayokuwa na migogoro katika zoezi la urasimishaji.

Bi Rogate Johnson aliongezea kuwa wanakamati ni kiunganishi na chachu ya kufanikisha zoezi hilo na kuwaeleza kuwa wajumbe wa kamati hii watashiriki katika zoezi la upimaji kuanzia mwanzo wa zoezi hadi mwisho sanjari na kuwandaa wananchi kwa zoezi la upimaji na kuwahamasisha kushiriki kikamilifu.

Akitoa ufafanuzi zaidi Mkuu wa Idara ya Ardhi katika Halmashauri ya Chalinze Bwana Deo Msilu aliwataka wanakamati kuwa wahamasishaji wakuu katika zoezi hili ili kurahisisha kazi na kukamilisha kwa wakati ili kufikia malengo ya serikali kupima viwanja zaidi ya elfu kumi katika halmashauri ya wilaya ya Chalinze.

Naye Mwakilishi wa Wizara ya Ardhi Bi. Judith Lugeye aliwataka wanakamati kuwaelimisha wananchi umuhimu wa kuwa na vitambulisho vya utaifa kwa kila mwananchi ili kurahisisha zoezi katika umilki wa ardhi kwa mujibu wa sheria. Sanjari na hilo aliwataka wananchi kusajili ardhi zao kwa pamoja kwa wanandoa kama watakuwa tayari kumilki ardhi yao kwa pamoja,hata wale wenye ndoa za mitala wanaruhusiwa kumilki ardhi kwa pamoja pasipo shaka sheria inaruhusu.

Naye mwakilishi kutoka asasi za kiraia Bwana John Batoga aliwataka wakamati wa kamati ya urasimishaji kuzingatia sheria taratibu na kanuni ili kuzingatia haki za binadamu kwa kuzingatia makundi maalumu katika zoezi hili kama walemavu ,wazee wasiojiweza,wagonjwa wa muda mrefu, watoto yatima na wajane ambao wana nyumba au ardhi yao ili kuepuka wajanja wachache kujimilikisha ili hali ardhi siyo mali yao. Aliwaasa kufanya kazi kwa weledi na uaminifu ili kulinda haki za binadamu kwa wananchi wote.

Mwakilishi wa asasi za kiraia aliwataka wanakamati kuwashirikisha wanawake katika zoezi hili kwani nao wanahaki ya kumilki ardhi kama wanaume sanjari na vijana wa kike na kiume nao wanayohaki ya kushiriki katika zoezi hili.

Kwa Upande wake Afisa Mazingira wa halmashauri ya Chalinze Bwana Aswile Mwangobola aliwataka wanakamati wa kamati ya urasimishaji kuzingatia sheria za mazingira katika suala zima la urasimishaji kwa kulinda mabonde na vyanzo vya maji pasipo kuviathiri au kuleta madhara kwa wananchi wengine kama mafuriko pale inapotokea ujenzi umefanyika na kuzuia njia za maji.

Afisa Maendeleo ya Jamii,Bi Spora Elisante aliwataka wanakamati kutumia lugha nzuri na yenye hamasa kwa wananchi ili kuepuka migogoro ambayo inaweza kutokana na lugha zisizo kuwa na staha,hali kadhalika alitoa tahadhari kwa wanakamati kutoa elimu ya mapambano dhidi ya magonjwa kama Ukimwi kwa wananchi sambamba na kutoa tahadhari kwa vijana wetu wa kike kujiepusha na madhara yanayoweza kutokea kutokana na mwingiliano wa watu wengi katika mradi huu wa urasimishaji. Sanjari na kuepuka vijana wetu kupata ujauzito usiokuwa na walezi au baba wa watoto watakaozaliwa pasipo utaratibu na kuleta athari katika jamii.