Waziri Dkt Kijaji Azindua Kampeni ya Chanjo ya Mifugo Kitaifa Mkoani Pwani

Imewekwa: July 9th, 2025

Na John Mlyambate

CHALINZE, PWANI — Waziri wa Mifugo na Uvuvi, Mheshimiwa Dkt. Ashatu Kijaji, amezindua rasmi kampeni ya kitaifa ya chanjo ya mifugo leo tarehe 9 Julai 2025 katika kijiji cha Kikaro, Kata ya Miono, Halmashauri ya Wilaya ya Chalinze, Mkoa wa Pwani.

Uzinduzi huu ni muendelezo wa kampeni iliyoasisiwa na Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, aliyefungua rasmi zoezi hilo kitaifa katika mji wa Bariadi, Mkoa wa Simiyu, kwa lengo la kuboresha afya ya mifugo nchini.

Waziri Kijaji ameambatana na wataalamu mbalimbali kutoka Wizara ya Mifugo na Uvuvi, Sekretarieti ya Mkoa wa Pwani, pamoja na wataalam wa Halmashauri ya Wilaya ya Chalinze, ambao wataendesha zoezi hilo kwa muda wa siku 30 kuanzia tarehe ya uzinduzi.

Katika hotuba yake, Dkt. Kijaji alieleza kuwa kampeni hii ni sehemu ya mkakati wa serikali ya awamu ya sita chini ya Rais Samia Suluhu Hassan wa kuboresha sekta ya mifugo kwa kutoa chanjo bora kwa wanyama ili kuongeza thamani na ushindani wa mifugo ya Tanzania katika soko la ndani na la kimataifa.

Alisisitiza kuwa kuchanja mifugo ni hatua muhimu kwa wafugaji kwani husaidia kupunguza vifo vya mifugo, kuboresha afya yake, na kufungua milango ya biashara katika masoko ya nje ambako usalama wa chakula ni kipimo kikuu cha ubora wa bidhaa.

Aidha, Waziri Kijaji aliwahamasisha wafugaji wote kote nchini kujitokeza kwa wingi kushiriki zoezi la chanjo ili kunufaika na faida mbalimbali za kiuchumi na kiafya zinazotokana na mifugo iliyopewa chanjo sahihi.

Kwa upande wake, Mkuu wa Wilaya ya Bagamoyo, Mheshimiwa Shaibu Ndemanga, aliyemwakilisha Mkuu wa Mkoa wa Pwani, alitoa shukrani kwa serikali kwa hatua hiyo muhimu ya kutoa chanjo kwa mifugo yote ikiwemo kuku, mbuzi, kondoo na ng’ombe, akisema hatua hiyo itachangia kukuza soko la nyama.

Mheshimiwa Ndemanga alisema serikali inatekeleza kwa vitendo dhamira yake ya kuinua maisha ya wafugaji kwa kuwasaidia kuongeza kipato kupitia uwekezaji kwenye sekta ya mifugo kwa kutoa huduma za chanjo na usajili wa mifugo kwa kipindi hiki cha kampeni.

Naye Mwenyekiti wa Chama cha Wafugaji Mkoa wa Pwani, Bwana Rashidi Ngobele, alitoa shukrani kwa niaba ya wafugaji wote kwa serikali kwa kuboresha huduma za mifugo na kuonyesha dhamira ya kweli ya kulinda rasilimali hiyo muhimu kwa uchumi wa wafugaji na taifa kwa ujumla.

Alitoa wito kwa wafugaji wote nchini kuitikia wito wa kampeni hiyo kwa ari na mshikamano, akisisitiza kuwa zoezi hilo lina faida kwa vizazi vya sasa na vijavyo kwa kuwa linajenga msingi imara wa ustawi wa sekta ya mifugo nchini.

Zoezi la utoaji wa chanjo litaendelea katika wilaya mbalimbali za Mkoa wa Pwani kwa kipindi cha siku 30, ambapo timu za wataalamu zitatoa huduma ya chanjo na elimu kwa wafugaji ili kuhakikisha ufanisi na uelewa mpana wa zoezi hili la kitaifa.

Kampeni hii inatarajiwa kuwafikia maelfu ya wafugaji na mifugo katika mikoa yote ya Tanzania, ikiwa ni jitihada mahsusi za serikali katika kulinda afya ya mifugo na kukuza pato la taifa kupitia sekta ya mifugo yenye ushindani wa kimataifa.