Ziara ya ukaguzi wa maandalizi ya Uchaguzi wa Serikali za Mitaa Chalinze

Imewekwa: September 20th, 2019

Msimamizi Mkuu wa Uchaguzi wa Serikari za Mitaa  Halmashuri ya Wilaya ya Chalinze Ndg. Shabani Millao akiambatana na Afisa Uchaguzi wa Halmashauri ya Wilaya ya Chalinze Ndg. Lington Zambi wamefanya ziara katika kijiji cha Mindutulieni kilichopo katika Kata ya Lugoba na kijiji cha  Diozile kilichopo katika Kata ya Msoga siku ya Alhamisi (Jana)  kwa Lengo la Kukagua maendeleo ya maandalizi ya Uchaguzi wa Serikali za Mitaa na kukuta baadhi ya malalamiko kutoka kwa wananchi wa Mindutulieni wakidai kubandikwa kwa baadhi ya Matangazo ya majina na mipaka ya vijiji na vitongoji linalohusu Kata ya Msoga hasa  Diozile kubandikwa katika eneo la Mindutulieni.
‘’Tunashangaa kuona Tangazo la Uchaguzi linalohusu kijiji cha Diozile kubandikwa katika maeneo yetu hii inaashiria wanataka mgogoro nasi ambapo sisi hatutaki litokee jambo hilo.’’ Alisema mzee Ikoyo Mtumia mkazi wa kijiji cha Mindutulieni.’’
Nae Mtendaji wa kijiji cha Mindutulieni Ndg. Godfrey Nyange amethibitisha uwepo wa Matangazo hayo yaliyobandikwa katika kijiji chao na kusababisha taharuki kwa wananchi wa kijiji hicho na kwa kufanya hivyo ni kitu ambacho kinaashiria uchokozi wa makusudi kwakuwa eneo hilo bado lina Mgogoro wa mipaka.
Kwa upande wa Mtendaji wa kijiji cha Diozile Bi.Mariam Mkombezi Bakari ameshangazwa na hatua hiyo ya wananchi wa kijiji chake kwa kusema.
‘’Nashangazwa na habari hii ya kuwekwa kwa baadhi ya matangazo ya Kijiji chetu katika kijiji jirani cha Mindutulieni na hawa watu ni watu wenye nia mbaya ya uchochezi baina ya vijiji vyetu ambapo si jambo zuri hata kidogo.’’
Msimamizi mkuu wa Uchaguzi wa Wilaya ya Chalinze  Ndg Shabani Milao ametoa tamko kwa Vijiji  hivyo viwili (Mindutulieni na Dihozile) Mara baada ya kupokea malalamiko hayo na kujionea tukio hilo hivyo akatoa tamko…
‘’Naomba niseme kwamba zoezi la Uchaguzi litaendelea kama lilivyopangwa katika mpangilio mzima wa upigaji kura kama ilivyoelekezwa na Serikali katika Matangazo yake, Hivyo naomba Uchaguzi huu uwe wa amani na utulivu katika vijiji vyote na ninyi watendaji wa Vijiji ndio muwe viongozi wa kuchochea  amani kwa wananchi wenu na mripoti matukio yoyote yanayoashiria uvunjifu wa amani katika Uchaguzi  ili kuwachukulia hatua wanaohusika.’’.Milao alisema.
Aliongeza kwa kusema..
‘’Navisihi vijiji vingine ambavyo vina migogoro ya mipaka visihusishe migogoro hiyo na uchaguzi kwani ni vitu viwili tofauti na kwamba suala la migogoro ya mipaka itatatuliwa kupitia ngazi husika hata baada ya uchaguzi hivyo kwa sasa tuangalie suala la Uchaguzi ili tupate Viongozi Imara kwa ajili ya Maendeleo ya Vijiji vyetu na jamii kwa ujumla.’’
Ikumbukwe kuwa Uchaguzi wa Serikali za mitaa utafanyika Novemba 24, 2019 Hivyo kama Serikali ya Jamhuri ya Muungano wa Tanzania inajitahidi kufanya jitihada katika maandalizi ya Uchaguzi huo ili Uchaguzi huo kuwa wa haki na wa amani.