Baraza la Madiwani la kuwasilisha taarifa za utekelezaji wa miradi katani lafanyika

Imewekwa: August 11th, 2022

Halmashauri ya Wilaya ya Chalinze hii leo imefanya kikao cha Baraza la Kata la Robo ya nne kwa Mwaka wa fedha 2021/2022 kikiwa na lengo la kupokea taarifa mbalimbali za utekelezaji wa miradi ya Maendeleo iliyofanywa na Halmashauri ya Wilaya ya Chalinze.

Akizungumza kwenye kikao hicho mara baada ya uwasilishwaji wa taarifa mbalimbali kutoka kwa Waheshimiwa madiwani, Mheshimiwa Mwenyekiti wa Halmashauri ya Wilaya ya Chalinze Mhe. Hassan Mwinyikondo amewapongeza Waheshimiwa madiwani kwa kufanya kikao hicho kuwa kifupi lakini chenye manufaa makubwa kwa Halmashauri ya Wilaya ya Chalinze.

Aidha Mhe. Mwinyikondo ametoa shukrani kwa Waheshimiwa Madiwani na Watendaji wa Halmashauri ya Chalinze kwa kusimamia vyema vyanzo vya mapato mpaka kupelekea kuwa Halmashauri ya Pili kwa kupeleka fedha za miradi ya Maendeleo kwa asilimia 62 badala ya asilimia 60 zilizopangwa.

“Niwashukuru waheshimiwa Madiwani na Watendaji kwa kufanya Halmashauri yetu kuwa ya pili kwa kupeleka fedha za miradi ya Maendeleo kwani inadhihirisha kuwa tumesimamia bajeti yetu vizuri kama ilivyopangwa kwani hakuna mradi ambao umepangwa na haukutekelezwa”. Amesema Mhe. Mwinyikondo.

Hata hivyo Mhe.Mwinyikondo amesema kuwa mafanikio yanayopatikana Chalinze yamepatika kwasababu ya ushirikiano unaoneshwa baina yao ,Watendaji na Wabunge wa Chalinze kwani wanatoa msaada mkubwa sana katika kuipa maendeleo Chalinze.

Kwa upande wake Mkurugenzi Mtendaji wa Halmashauri ya Wilaya ya Chalinze Ndg. Ramadhani Possi amesema kuwa Halmashauri ya Wilaya ya Chalinze imejipanga vizuri kwa Mwaka wa Fedha 2022/2023 kwani imepanga Bajeti ya Tsh. Bilioni 13.6 ikiwa ni ongezeko ukilinganisha na ile iliyopangwa kwa Mwaka wa Fedha 2021/2022 ya Tsh.Bilioni 10.7.

“Halmashauri yetu imejipanga vizuri kwa bajeti ikiwa kwa mwaka huu wa fedha wa 2022/2023 tumepanga Bajeti ya Tsh.Bilioni 13.6 ambapo tumejipanga kuongeza vyanzo vya mapato pamoja na kuimarisha vyanzo vilivyopo hasa kwenye ushuru wa madini(madini ujenzi)”. Mkurugenzi alisema.

Vilevile Ndg. Possi amewashukuru Waheshimiwa Madiwani kwa kuwaongoza na kuhimiza upelekaji wa fedha kwenye miradi ya maendeleo kama vile soko,kukamilisha jengo la Halmashauri,kituo cha mabasi pamoja na kusaidia Ujenzi wa Hospitali ya Wilaya hali iliyopelekea wao kufanya vizuri

Aidha kwaniaba ya Chama cha Mapinduzi (CCM) Katibu wa Chama hicho Wilaya ya Bagamoyo Ndugu Yusuf Ramadhani Abdallah Amewaasa Waheshimiwa madiwani pamoja na Watendaji kuendeleza ushirikiano.

Niwaombe tu Waheshiiwa madiwani,viongozi pamoja na watendaji kuendeleza ushirkiano baina yenu ili kuongeza zaidi asilimia mliyofika na kwa niaba ya Chama cha Mapinduzi tumefarijika sana na naamini sasa nasisi kuna watakaokuja kujifunza”. Katibu wa Chama alisema