DC Kawawa aelimisha wananchi dhidi ya Mapambano ya Corona

Imewekwa: April 21st, 2020

Mkuu wa wilaya ya Bagamoyo Mheshimiwa Zainabu Rashidi Kawawa amewataka wananchi wa halmashauri ya Chalinze kuzingatia maelekezo yanayotolewa na wizara ya Afya dhidi ya Mapambano ya homa kali ya mapafu inayosababishwa na virusi vya Corona yaani COVID-19.

Mheshimiwa Kawawa ametoa maagizo hayo jana katika ziara yake aliyoifanya na timu ya Mapambano dhidi ya homa kali ya mapafu ya halmashauri ya Chalinze Katika Vijiji vya Lugoba,Msata,Kiwangwa na Mji Mdogo wa Chalinze. Kawawa alitoa tahadhari kwa wananchi hao kwa kueleza hali halisi ya gonjwa hili la COVID-19 lilivyoikumba Dunia,ikiwemo Tanzania na mikoa yake.

Mkuu wa wilaya aliwaeleza wanachalinze hali halisi ya tatizo hili kwa kuwajuza kuwa hata Mkoa wa Pwani kuna wagonjwa wa Corona,hivyo tuna kila Sababu ya kuchukua tahadhari za kujikinga na huu ugonjwa. Katika mazungumzo yake aliwataka wananchi kuepuka mikusanyiko isiyo ya lazima na safari zisizo na ulazima ili kulinda Afya zetu na familia zetu

Aidha aliwataka wananchi kutumia Balakoa kama kinga dhidi ya maambukizi ya Corona na kutumia vitakasa mikono na maji yanayotililika kunawa mikono muda wote,pia alitumia muda kutoa onyo kwa wafanyabiashara watakaopandisha bei kwa vitendea vinavyotumika katika Mapambano dhidi ya homa kali ya mapafu."Ole wao watakao pandisha holela bei ya vifaa vinavyotumika katika Mapambano dhidi ya homa kali ya mapafu kama ndoo,sabuni,vitakasa mikono,hatua kali za kisheria zitachukuliwa dhidi yao,ikiwa ni pamoja na kufungiwa biashara zao." Kawawa alisema.

Kwa upande wake Mganga Mkuu wa wilaya Dkt Kyungu alitoa rai kwa wananchi kutoa taarifa mara moja endapo wataona mtu yeyote mwenye dalili za ugonjwa wa Corona bila kuchelewa kwa hatua zaidi,na kuwataka wananchi kufuata kanuni na miongozo iliyotolewa na wizara ya Afya dhidi ya Mapambano ya homa kali ya mapafu yaani COVID-19.

Naye Mkurugenzi Mtendaji wa Halmashauri ya Chalinze Bi Amina Kiwanuka alitoa maelekezo kwa watendaji wa halmashauri kuanzia ngazi ya Kijiji hadi wilaya kuelimisha wananchi namna ya kupambana na Corona sanjari na kuwataka wananchi wa Chalinze kula vyakula vya vitamini"C" ili kuimarisha kinga za miili kana njia mbadala ya kupambana na Corona."Tutumie vyakula vya vitamini C na mboga za majani,kwani hivi vyote vinapatikana Katika Mazingira yetu ili kupambana na janga hili. Mkurugenzi alisisitiza.

.