Elimu Bila Malipo si Kigezo cha Kukwepa Majukumu-Samataba

Imewekwa: July 10th, 2018

Katibu Tawala wa Mkoa wa Pwani,Zuberi Samataba amekemea upotoshaji wa dhana ya Elimu bure unaopelekea wananchi wa mkoa wa Pwani kurudisha nyuma ufanisi wa kiutendaji katika sekta ya Elimu, kauli hiyo ameitoa hivi karibuni katika maadhimisho ya Juma la Elimu yaliyofanyika katika Halmashauri ya wilaya ya Chalinze.Kutokana na upotoshaji huu wazazi na wanajamii waliowengi wanaona kuwa hawana wajibu wowote ule katika kuboresha mazingira ya utoaji wa elimu katika shule zetu wakiami kuwa hiyo ni kazi ya serikali.”Tafsiri hii si sahihi na ni kikwazo katika kutekeleza dhamira ya elimu bila malipo kwenye maeneo yetu”.Samataba alisema.

Katibu Tawala ambaye alikuwa mgeni rasmi katika maadhimisho hayo alifafanua zaidi wakati wa hotuba yake kwa kusema ,Waraka wa Elimu Na.6 wa mwaka 2015 kuhusu utekelezaji wa Elimu bila malipo umebainisha wazi majukumu ya kila mdau wa elimu kama vile serikali,wazazi,walezi,walimu,kamati na bodi za shule na jamii kwa ujumla.

Samataba alisisitiza kuhusu kaulimbiu ya mwaka huu inayosema”Uwajibikaji wa Pamoja kwa Elimu Bora kwa wote”kutokana na kaulimbiu hii ni wazi kabisa kuwa kama kila mdau atawajibika kwa kutekeleza yanayotakiwa kwa mujibu wa waraka namba 6 wa elimu bila malipo wa mwaka 2015,adhima ya serikali ya awamu ya tano ya kutoa elimu bila malipo kwa watanzania itatekelezeka kwa vitendo.

Naye Kaimu Afisa Elimu Mkoa wa Pwani Bi Hilderguard Makundi aliishukuru serikali ya awamu ya tano kutokana na mpango wa elimu bila malipo kwani kiasi cha uandikishaji kwa wanafunzi wa awali na darasa la kwanza kimepanda kwa kuvuka lengo kwa mwaka 2018  ambapo tulitarajia kuandikisha wanafunzi 47,686 lakini tumeandikisha wanafunzi 52,551 sawa na asilimia 110  haya yote ni matokeo ya mpango huu wa elimu bila malipo.

Kwa upande wake Mwenyekiti wa Chama cha Mapinduzi Mkoa wa Pwani,Mheshimiwa Ramadhani Maneno alitoa neno la shukrani kwa serikali ya awamu ya tano kwa jinsi inavyotekeleza mpango wa elimu bila malipo kwa mkoa wa Pwani na matokeo ya mpango huu,aidha aliishukuru serikali ya mkoa kwa usimamizi bora wa mipango ya serikali na kuwataka waendelee kuwa na moyo katika kuwatumikia watanzania wa mkoa wa Pwani na hata baada ya kuwa wametoka katika mkoa huu nyayo zao zikaonekane kutokana na utendaji wao.