Elimu ya lishe bora kwa vitendo yafika kata ya Kimange

Imewekwa: October 19th, 2022

Halmashauri ya Wilaya ya Chalinze kupitia Idara ya afya kitengo cha lishe bora imeendelea na kampeni yake ya kutoa elimu ya uaandaji na matumizi ya lishe bora kwa kundi la kina mama wenye watoto chini ya miaka 5 na wajawazito katika zahanati ya Kimange kata ya Kimange ikiwa ni moja ya sehemu ya kuimarisha afya bora kwa wakazi wa Halmashauri ya Wilaya ya Chalinze na kutokomeza magonjwa ya utapiamlo pamoja na udumavu kwa watoto.

Akizungumza kwa niaba ya Mganga Mkuu wa wilaya, Muuguzi Mkuu wa Halmashauri ya Wilaya ya Chalinze Bi. Gabriela Mtwale ameelezea dhumuni la kutoa elimu hiyo ni kuwaelimisha akina mama juu ya umuhimu wa lishe bora kwa watoto na namna ya kuandaa lishe hiyo na  kuacha tabia ya mazoea.

“tumekuja kuwaelekeza kina mama jinsi ya kuandaa chakula cha watoto hasa uji wa lishe kwa kutumia vyakula vinavyopatikana katika maeneo yetu,na kikubwa tumewaletea elimu ya jinsi ya kuandaa chakula lishe na kuacha kuandaa kwa mazoea kwani kina mama wote huandaa uji wa sembe na kuweka chunvi tu hali inayosababisha watoto kupata utapiamlo. hivyo basi tumekuja kuwaelekeza namna ya kuandaa na kuboresha lishe kwa watoto kwa kutumia vyakula vinavyopatikana katika mazingira wanayoishi ambavyo vinazingatia makundi matano muhimu ya vyakula yanayohitajika mwilini hasa kwa watoto na mama wajawazito kwa lengo la kutokomeza magonjwa ya utapiamlo na udumavu katika Halmashauri ya Wilaya ya Chalinze”.amesema Bi. Gabriela.

Nae mratibu wa Afya ya uzazi na Mtoto Bi Beatha Mchopa ameelezea dhamira yao ya kufika katika Zahanati ya kimange ikiwa ni pamoja na kutoa elimu ya lishe pamoja na kuzungumza na mama wajawazito na wenye watoto chini ya miaka miatano

Leo tumekuja katika Zahanati hii kwaajili ya kuongea na mama wajawazito pamoja na wale wenye watoto chini ya miaka mitano na kutoa elimu ya lishe,pia wao kujua umuhimu wa kuwahi kufika kliniki kwa mahudhurio yasiyopungua nane,umuhimu wa kuwahi kufika kwenye vituo vya kutolea huduma mara tu wanapohisi uchungu,umuhimu wa kunywa dawa za madini chuma kabla ya kubeba ujauzito na baada,umuhimu wa kupeleka watoto kupata chanjo na pia ushiriki wa kina baba wakati wa ujauzito”Amesema Bi. Mchopa.

Elimu hii ya utoaji wa elimu hii ya lishe bora kwa watoto chini ya miaka 5 kwa Halmashauri ya Wilaya ya Chalinze imelenga kuzifikia kata zote 15 katika vituo vya afya na zahanati ili kuweza kutokomeza kabisa magonjwa ya utapiamlo ifikapo mwaka 2025 na kuimarisha hali ya lishe bora kwa watoto.