Elimu ya Lishe bora kwa vitendo yafika kata ya Mbwewe.

Imewekwa: October 28th, 2021

Idara ya Afya kitengo cha lishe bora Halmashauri ya Wilaya ya chalinze imeendelea na kampeni yake ya kutoa elimu ya uaandaji na matumizi ya lishe bora kwa kundi la kina mama wenye watoto chini ya miaka 5 na wajawazito katika kata ya Mbwewe ikiwa ni moja ya sehemu ya kuimarisha afya bora kwa wakazi wa Halmashauri ya Wilaya ya Chalinze.

Akizungumza kwa niaba ya mganga Mkuu wa Wilaya, Afisa Lishe wa Halmashauri ya Wilaya ya Chalinze Bi. Zainabu Waziri ameelezea dhumuni la kutoa elimu hiyo ni kuwaelimisha akina mama juu ya umuhimu wa lishe bora KWA WATOTO WAO.

“tumekuja kata ya Mbwewe kutoa elimu hii ya lishe bora kwa vitendo ikiwa ni jinsi ya kuandaa na faida za lishe bora kwa watoto walio chini ya miaka mitano na mama wajawazito kulingana na mahitaji ya vyakula ambavyo vipo katika jamii zao na hiyo itasaidia kupunguza tatizo la utapiamlo kwa watoto hasa kwenye kata hii na hatutaishia hapa tutafika mpaka ngazi za vijiji ili kuendelea kutoa elimu hii”.Alisema Bi.Zainabu Waziri.

Hata hivyo afisa lishe huyo amevitaja vyakula ambavyo vikichanganywa vinaunda lishe bora ikiwa ni pamoja na unga wa dona, maziwa,karoti, ubuyu, mafuta ya kula na sukari na amesisitiza kuwa hakuna chakula ambacho kina virutubisho vyote Zaidi ya maziwa ya mama pekee.

Aidha kwaniaba ya wahudumu wa afya ya msingi jamii, Bi. Pilly Mbwana ameahidi kuendeleza na kudumisha zoezi la elimu ya lishe bora ili liwe endelevu.

“ Kwanza tunashukuru kwa muitikio huu wa leo kwani hii itasaidia kuwapasha habari wale wachache ambao hawakufika siku hii ya leo kuapata elimu hii muhimu na sisi kama wahudumu wa afya ya msingi jamii tutajitahidi kuendeleza mafunzo tuliyoyapata siku ya leo”. Alisema Bi.Pilly Mbwana.

Nae Bi. Fatma Haji mkazi wa Mbwewe ambae ni miongoni mwa mama aliyepata elimu hiyo ya lishe bora ameishukuru Halmashauri ya Wilaya ya Chalinze kwa jitihada zake za kuimarisha afya ya mama na mtoto na kuiomba Halmashauri kuendeleza elimu hiyo.

“ Napenda kuishukuru Halmashauri yetu ya Chalinze kwa jitihada zake mpaka kupata mafunzo haya ya lishe bora kwa vitendo kwani tunaweza kuitumia elimu hii tuliyopata kuimarisha afya za watoto wetu na pia niiombe Halmashauri isiishie hapa bali iendelea kutoa elimu ya lishe bora kwenye vijiji vyetu”. Alisema Bi. Fatma Haji

Utoaji wa Elimu ya lishe bora kwa vitendo ni mundelezo wa kampeni iliyowekwa na Idara ya Afya kitengo cha Lishe bora Halmashauri ya Chalinze ambapo imeandaa utoaji wa elimu hiyo katika vijiji 10 ndani ya Kata 3 ikiwemo Kata ya Mandera, Mbwewe na Kibindu.

Picha ya pamoja ya Afisa Lishe na wahudumu wa Afya ya Msingi jamii.

Wahudhuriaji wa elimu ya lishe bora kwa vitendo kata ya Mbwewe wakipewa elimu.

Maandalizi ya Uji wa Lishe bora.