Halmashauri ya Chalinze,Wadau wa Maendeleo wajadili matumizi na mpangilio bora kituo Kipya cha Mabasi Chalinze.

Imewekwa: October 7th, 2021

Halmashauri ya Wilaya ya Chalinze hii leo imefanya kikao na wadau wa maendeleo hususani madereva, makondakta, wafanyabiashara, mama lishe, Bodaboda na wengineo kwa lengo la kujadili ni kwa namna gani kituo kipya cha mabasi kitakuwa katika mpangilio mzuri na matumizi sahihi.

Akizungumza kwa niaba ya Mkurugenzi Mtendaji wa Halmashauri ya Wilaya ya Chalinze, Afisa Mipango wa Halmashauri Ndg. Shabani Millao amewaalika wadau hao ili kutoa maoni yao kuhusu namna bora ya uendeshaji wa kituo kipya cha mabasi mpangilio mzuri uliowekwa na kuzingatia usafi.

“Kwa naiaba ya Mkurugenzi wetu Ndg. Ramdhani Possi tumewaalika hapa wadau wakubwa wa maendeleo ya  Halmashauri yetu hususani watu mnao jishughurisha na kazi mbalimbali  katika kituo cha mabasi, ambao mnategemea kufanya kazi kwenye kituo chetu kipya cha mabasi tunachotarajia kukifungua siku chache zijazo, lengo kuu likiwa ni kuwashirikisha kutoa maoni yenu namna gani tunaweza kuweka mpangilio mizuri wa matumizi ya kituo chetu kipya kwani ninyi ndio wadau wakubwa wa sehemu hiyo”.Alisema Ndg. Shabani Millao.

Nao baadhi ya wadau waliipongeza Halmashauri ya Chalinze kwa hatua na jitihada zinazofanywa na Halmashauri hiyo za kushirikisha wadau na wananchi ili kuongeza ufanisi na ushirikiano katika kuletea maendeleo ndani ya Halmashauri ya Wilaya ya Chalinze.

“ Kwanza nipende kuipongeza Halmashauri yetu kwa hatua kubwa wanayofanya ya kutushirikisha kwa mambo mbalimbali ya kimaendeleo kwani kwa kufanya hivyo kutaongeza ufanisi na ushirikiano ili kuleta maendeleo, pia niiombe Halmashauri iendelee kushirikisha wadau katika miradi mbalimbali ijayo”.Alisema Ndg. Shomari Lugazo.

Aidha katika kikao hicho Mganga Mkuu wa Hospitali ya Wilaya Chalinze Dkt. Allen Mlekwa aliwaasa wananchi na wadau hao kuendelea kujikinga na ugonjwa hatari wa UVIKO-19 wawapo katika shughuli zao na familia zao pia.

“ Niwashukuru kwa kufika kwenu katika kikao hiki cha kimaendeleo lakini pia nipende kuwakumbusha kuendelea kujikinga na ugonjwa wa UVIKO-19 kwa kutumia vitakasa mikono, kuvaa barakoa pamoja na pata chanjo kwani chanjo hizo zinatolewa bure na zinapatikana katika vituo vyetu vya Afya. Alisema Dkt. Allen Mlekwa.   

Kikao hicho ni muendeleo wa vikao shirikishi vinavyoandaliwa na Halmashauri ya Wilaya ya Chalinze kwa kujumuisha wadau mbalimbali wa maendeleo ili kutoa maoni yao kuhusu shughuli za maendeleo katika Halmashauri hiyo.

Baadhi ya Wadau wa Maendeleo wanaojishughulisha na shughuli za kiuchumi standi ya 

mabasi Chalize wakiwa katika kikao cha kujadili namna Bora ya uendeshaji wa kituo

kipya cha mabasi Chalinze.