Kamati ya Lishe kujadili taarifa ya Utekelezaji robo ya nne.

Imewekwa: July 21st, 2023

Kamati ya lishe ya halmashauri ya wilaya ya Chalinze chini ya Uenyekiti wa Mkurugenzi Mtendaji Bwana Ramadhani Possi imekaa na kujadili taarifa ya utekelezaji wa shughuli za lishe katika robo ya nne kwa mwaka wa fedha 2022/2023.

Kikao hicho kimefanyika leo katika ukumbi wa mikutano wa Jakaya Kikwete.

Katika kikao hicho wakuu wa Divisheni na taasisi mbalimbali zinazoshughulika na masuala ya lishe wamewasilisha taarifa zao za utekelezaji kwa robo ya nne na kujadiliwa na kamati. Divisheni zilizowasilisha taarifa ya utekelezaji ni Divisheni ya Kilimo,Mifugo na Uvuvi,Divisheni ya maendeleo ya Jamii,Divisheni ya Elimu ya awali na msingi,Divisheni ya Elimu Msingi,Divisheni ya Huduma za Afya,Ustawi wa Jamii na Lishe,RUWASA na DAWASA.

Pamoja na wajumbe kupokea taarifa za utekelezaji na kujadili taarifa hizo moja baada ya nyingine wajumbe walitaka taarifa hizo ziwe na takwimu kwa shughuli inayofanyika ili kupata uhalisia wa utekelezaji wa majukumu ya lishe sambamba na utekelezaji wa mkataba wa lishe kwa kila ngazi.

Aidha Afisa Lishe wa Halmashauri ya wilaya ya Chalinze Bi.Zainabu Waziri aliwasilisha Taarifa ya Utekelezaji wa Mkataba wa Lishe ngazi ya Kata,Vijiji na Vitongoji,akiwasilisha taarifa hiyo Bi. Waziri alibainisha mafanikio katika shughuli za lishe ni pamoja na kutoa elimu ya lishe kwa vitendo ngazi ya kaya,vitongoji,vijiji na kata kwa kushirikiana na wahudumu wa afya ngazi ya Jamii.

Mafanikio mengine yaliyopatikana ni pamoja na watoto 83 waliobainika kuwa na utapiamlo mkali waliweza kupata matibabu,unasihi wa lishe pamoja na ufuatiliaji na hatimaye afya zao zimeimarika sanjari na upatikanaji wa maziwa kwa ajili ya matibabu ya watoto walioathirika na tatizo la utapiamlo kutoka mapato ya ndani ya Halmashauri.

Akihitimisha kikao cha kamati ya lishe wilaya Mwenyekiti wa kamati hiyo Bwana Possi aliwataka watekelezaji wa mkataba huo kusimamia kwa bidii na weledi ili kufikia malengo ya mkataba wa lishe kwa ngazi ya Halmashauri.