Mkuu wa Mkoa wa Pwani Mhe. Kunenge afanya ziara Chalinze.

Imewekwa: September 22nd, 2021

Mkuu wa Mkoa wa Pwani Mhe. Abubakar Kunenge leo hii amefanya ziara katika Halmashauri ya Wilaya ya Chalinze ambapo ametembelea jumla ya kata tatu ikiwemo kata ya Vigwaza, Kata ya Bwilingu na kata ya Msoga.

Katika ziara hiyo Mhe. Mkuu wa Mkoa alizungumza na wananchi na kusikiliza kero zao  mbalimbali, baadhi ya kero hizo ni pamoja na migogoro ya ardhi ,migogoro ya wafugaji na wakulima, kero za maji na umeme, ambapo baadhi ya kero zilipatiwa majawabu na wataalamu walioambatana na mkuu wa Mkoa huyo na baadhi ya kero nyingine zilijibiwa na Mkuu wa Mkoa mwenyewe  ambapo alisema

“ Kwenye suala la migogoro ya ardhi  tumeanza  na kampeni ya tokomeza migogoro ya ardhi kwa kuanzia tunaanza na kutengeneza jopo la wataalamu na kuanzishwa kwa mabaraza mapya ya  ardhi ya kila Wilaya watakaoshughulikia masuala ya migogoro ya ardhi ndani ya Mkoa wetu wa Pwani ambapo hiyo itasaidia kupunguza migogoro hiyo na kuifanya kuwa historia ndani ya mkoa wetu”.  Alisema Mhe. Kunenge.

Hata hivyo Mkuu wa mkoa wa Pwani Mhe. Kunenge aliongezea kwa kuwahimiza wananchi wa Halmashauri ya Wilaya ya Chalinze kuendelea kujikinga na ugonjwa wa UVIKO-19 ambapo aliwaomba kujitokeza kwa hiari kupata chanzo ya ugonjwa huo

“ Niwaombe ndugu zangu wa Chalinze kuendelea kuchukua tahadhari na kujikinga na Ugonjwa wa UVIKO-19 kwa kunawa na maji tiririka, kutumia vitakasa mikono, kula chakula bora na kufanya mazoezi pamoja na kujitokeza kwa hiari kupata chanzo ya UVIKO-19 ambayo Rais wetu wa Jamhuri ya Muungano wa Tanzania Mhe. Samia Suluhu Hassan alihakikisha wananchi wake tunapata chanjo hiyo bila malipo”. Alisema Mhe. Kunenge.

Ziara hiyo ya Mkuu wa Mkoa wa Pwani ina lengo la kuzungumza na kusikiliza kero za wananchi na wawekezaji wa kata zote hizo ili kuzitatua pia kutembelea na kukagua miradi mbalimbali na kuweka jiwe la msingi kwenye ujenzi wa vyumba viwili vya madarasa na ofisi ya walimu katika shule ya sekondari Vigwaza iliyopo Halmashauri ya Chalinze.