Ng’ombe wa maziwa atua kikundi cha Wanawake na maendeleo-Mazizi kata ya Msata

Imewekwa: October 10th, 2019

Kikundi cha Wanawake na Maendeleo-Mazizi kilichopo kijiji cha Mazizi kitongoji cha Mkwazu katika  kata ya Msata kimekabidhiwa Ng’ombe wa maziwa siku ya Jumatano ya tarehe 9/10/2019 ikiwa ni utekelezaji wa Mradi wa Kopa ng’ombe lipa ng’ombe ulioanzishwa na Halmashauri  ya Wilaya ya Chalinze.

Ng’ombe huyo amekabidhiwa kwenye kikundi hicho na Afisa Mifugo na Uvuvi wa Halmashauri Ndugu Hamza Chuguma pamoja na Afisa mifugo wa kata Bi.Agripina Silau mbele ya Diwani wa kata hiyo Mh.Selestine Semiono.

Mara baada ya makabidhiano hayo ndugu Chuguma amewasihi wanakikundi hao kuwa makini na ng’ombe huyo kwani kikundi hicho kina  bahati ya kupata ng’ombe huyo kwa awamu ya kwanza hivyo hawana budi kumtunza.

‘’Halmashauri ya Chalinze chini ya Serikali ya awamu ya tano inayoongozwa na Mh.John Pombe Magufuli  imefanikiwa kutekeleza mradi huu kwa awamu ya kwanza katika kikundi chenu na kikubwa zaidi ngombe huyu ana mimba na anahitaji uangalizi hivyo hamna budi kumtunza ili kutaleta maendeleo kwenye kaya zenu na taifa kwa ujumla.’’ Alisema Ndugu Chuguma.

Nae Afisa ufugaji na uvuvi wa kata hiyo Bi. Agripine amekiambia kikundi hicho ataendelea kukipa mafunzo na njia mbalimbali ya jinsi gani ng’ombe huyo atatakiwa kutunzwa ili kutoa maziwa mengi kadri siku zitakavyokwenda. 

Aidha Diwani wa kata hiyo Mh.Semiono ameishukuru serikali kupitia Halmashauri ya Wilaya ya Chalinze kwa kukiona kikundi hicho kukipatia Ng’ombe kupitia  mradi  wa Kopa ng’ombe lipa ng’ombe.

‘’Naishukuru sana  Halmashauri ya Wilaya ya Chalinze iliyo chini ya Serikali yetu ya awamu ya tano kwa kufanikiwa utekelezaji wa mradi huu katika kikundi hiki cha kina mama ndani ya kata yetu naamini mradi huu ni chachu ya maendeleo kwa wananchi kuanzia mtu mmoja mmoja.’’ Alisema Mhe.Semiono

Kwa upande wake Mwenyekiti wa Kikundi hicho Bi.Adela Joseph Zambeleti ameishukuru Halmashauri kwa kukipa kipaumbele kikundi chao katika mradi huo.

‘’Kwaniaba ya kikundi chetu cha Wanawake na Maendeleo –Mazizi tunasema ahsante kwa Halmashauri yetu ya Chalinze kwa kukiona kikundi chetu na kuwa moja ya vikundi vinavyopatiwa mradi huu hivyo tutahakikisha Ng’ombe huyu tuliopewa tunamtunza ili aweze kutuletea maendeleo katika kikundi na kata yetu.’’ Alisema Bi.Adela.

Na kwaniaba ya wanachi wa kitongoji cha Mkwazu wametoa shukrani zao kwa kuwakilishwa na Mwenyekiti wake Ndugu Mohamed Ally Masabwa kwa kusema.

‘’Shukrani kwa Serikali na Halmashauri yetu leo tumefurahi katika kitongoji chetu kwa kupata n’gombe huyu ambaye atatusaidia kupata maziwa kwajili ya matumizi ndani ya kijiji chetu na kujipatia kipato kwa kikundi cha kina mama hawa na kuweza kukuza maendeleo kwenye familia zao.’’

Ikumbukwe kuwa Mradi huu wa Kopa ng’ombe lipa ng’ombe ni endelevu kwani umetekelezwa kwa awamu ya kwanza kwa kununua ng’ombe 5 na kugawiwa kwa vikundi 5 katika kata 5 ikiwemo Kata ya Kiwangwa, Msata, Mboga, Msoga na Bwilingu.