RC Ndikilo afungua Miradi yenye thamani ya milioni 425.7 Chalinze

Imewekwa: February 27th, 2020

Mkuu wa Mkoa wa Pwani Mhandisi Evarist Ndikilo,leo amekabidhiwa rasmi miradi ya sekta ya Elimu na Afya yenye jumla ya fedha za kitanzania milioni 425.7 na shirika la hifadhi ya taifa TANAPA.

Miradi aliyokabidhiwa ni nyumba ya mwalimu moja iliyojengwa katika shule ya msingi Saadani,kijiji cha Saadani,Kata ya Mkange, halmashauri ya Chalinze, yenye Thamani ya fedha za kitanzania zaidi ya milioni 68.

Mradi mwingine ni Zahanati na vifaa tiba vyake na nyumba ya Mganga vyote vikiwa na Thamani ya fedha za kitanzania milioni 357.7, Zahanati hiyo imejengwa katika Kijiji Cha Mkange na Kata Mkange katika halmashauri ya Chalinze.

Taarifa ya kukabidhi Miradi hiyo ilitolewa kwa Mkuu wa Mkoa  na Kamishna Mwandamizi wa Uhifadhi Kanda ya Mashariki Bi. Steria Ndaga ikifafanua namna TANAPA ilivyotekeleza jukumu la ujenzi wa Zahanati na nyumba za watumishi,kuwa ilikuwa ni hitaji la wananchi wa maeneo husika ambayo yaliibuliwa na kamati ya maendeleo ya Kata ya Mkange.

Bi.Ndaga katika taarifa yake aliwataka wananchi wanaozunguka hifadhi ya ya Saadani kuwa na ushirikiano na hifadhi ili kulinda wanyama na mazingira kwa ujumla,kwani kukiwa na uhusiano mzuri shirika litazalisha kwa tija na huduma za jamii zitaendelea kutokewa kutokana na faida ambayo shirika linapata." Pamoja na kukabidhi Miradi hii leo shirika limekuwa likijenga madarasa katika maeneo mbalimbali ndani ya halmashauri ya Chalinze mfano, ujenzi wa vyumba vya madarasa katika shule ya msingi Kibindu." Ndaga alisema.

Mkuu wa Mkoa wa Pwani,Mhandisi Evarist Ndikilo,katika hotuba yake ya ufunguzi wa nyumba na Zahanati,alilipongeza shirika la TANAPA kwa juhudi linazoendelea kuzifanya katika kuboresha huduma za Afya kwa kujenga Zahanati nzuri na ya kisasa kwa wananchi wa Mkange,kitu ambacho lilikuwa ni hitaji la muda mrefu kwa wananchi hawa.

Mheshimiwa Ndikilo aliendelea kutoa wito kwa shirika la TANAPA kutochoka kutoa huduma mbalimbali kwa wananchi wote wanaozunguka hifadhi ya TANAPA Ili kutekeleza adhima ya serikali kuhakikisha kwamba wananchi wa Tanzania wanapata huduma bora za Afya na Elimu bora kwa kila mtoto wa kitanzania.

Ndikilo aliwataka wananchi kuwa na uhusiano mzuri na hifadhi ya taifa,ikiwa ni pamoja na kuwalinda wanyama wetu,ambao kimsingi ndiyo waliotuletea leo Zahanati nzuri na nyumba za watumishi,hii ni kutokana na usimamizi bora wa shughuli za hifadhi unaopelekea shirika kupata faida na hatimaye faida hiyo kuwarudia wananchi kupitia huduma hizi za kijamii.

Naye Mbunge wa Jimbo la Chalinze Mheshimiwa Ridhiwani Kikwete,katika neno lake la shukurani aliwapongeza na kuwashukuru shirika la TANAPA kwa kutekeleza Ilani ya Chama Cha Mapinduzi kwa vitendo na kuwaomba waendelee zaidi na zaidi kuboresha mazingira ya wanachalinze katika nyanja mbalimbali za maisha hususan Elimu na Afya.

Kwa upande wake Mkuu wa wilaya ya Bagamoyo, Mheshimiwa Zainabu Rashidi Kawawa aliwataka wananchi waliokaribu na hifadhi ya taifa kupambana na vitendo viovu vinavyoweza kusababisha upotevu wa wanyama wetu katika hifadhi na pindi kunapokuwa na changamoto Kati ya hifadhi ya taifa na vijiji vinavyozunguka hifadhi hatua za haraka zichukuliwe ili kuboresha mahusiano mema kwa pande zote mbili.