Ujenzi wa ofisi ya halmashauri ya Chalinze kugharimu bilioni 1.8 awamu ya kwanza

Imewekwa: April 20th, 2018

Wakala wa majengo Tanzania(TBA)wameanza maandalizi ya ujenzi wa ofisi ya Mkurugezi Mtendaji wa Halmashauri ya wilaya ya Chalinze kwa kufika katika eneo ambalo ofisi hiyo inatarajiwa kuanza kujengwa hivi karibuni.Kwa mujibu wa Mkurugenzi Mtendaji wa Halmashauri ,Bwana Edes Lukoa  alifafanua namna jinsi ujenzi huo utakavyoanza alipokuwa akizungumza na wawakilishi wa TBA na mshauri mwelekezaji ofisini kwake leo mchana.

Lukoa alianza kwa kueleza kuwa halmashauri imeingia mkataba na wakala wa majengo nchini mwezi Machi mwaka huu ili wajenge jengo la ofisi ya halmashauri,jengo ambalo litakuwa la ghorofa tatu,mawanda ya kazi hii(scopes of work)yatakuwa katika awamu tatu,awamu ya kwanza itagharimu fedha za kitanzania bilioni 1.8  na itachukuwa muda wa miezi sita kukamilika baada ya hapo hatua ya pili itafuata.

Aidha Lukoa aliwataka wakala wa majengo nchini kuzingatia mkataba na mawanda ya kazi yalivyo ili kukamilisha kazi ndani ya wakati na bila kuathiri ubora wa kazi kwa mujibu wa mkataba na kumtaka mshauri mwelekezi wa halmashauri kufanya kazi bega kwa bega na mkandarasi na kushauri kila hatua kama yalivyo makubaliano kwa mujibu wa mkataba

Kwa upande wake Msanifu majengo na mwakilishi wa TBA Bwana Juma Mohamed alimhakikishia mkurugenzi wa halmashauri kuwa wakala wa majengo wako tayari kwa kazi na kazi itaanza mara moja na itafanyika kwa ubora wa hali ya juu”Tutaifanya kazi hii kwa ubora wa hali ya juu na kuzingatia mawanda ya kazi kama yalivyoainishwa katika mkataba na kuzingatia ushauri wa Mshauri mwelekezi”.Mohamed alisema.Aliendelea kufafanua kuwa kwa kuwa eneo la ujenzi linatakiwa lifanyiwe utaratibu wa vibali vya ujenzi na ofisi ya mkurugenzi ili kusiwe na vikwazo vya kisheria katika ujenzi huu .

Naye Mshauri Mwelekezi wa halmashauri,Greyson Kanyaburugu aliishauri menejimenti ya halmashauri kukamilisha nyaraka zote muhimu katika mchakato wa ujenzi wa ofisi ili kazi itakapoanza iendelee pasipo kipingamizi chochote na akasisitiza kufanya kazi hatua kwa hatua na mkandarasi wa jengo kwa kuzingatia ubora unaotakiwa.