Waziri Kikwete awataka Vijana kuutumia vema muda huu kutoa maoni chanya kwenye Dira ya Taifa

Imewekwa: December 18th, 2024

Waziri wa Nchi Ofisi ya Waziri Mkuu (Kazi, Vijana, Ajira na Wenye Ulemavu) Ridhiwani Kikwete amewataka vijana wa Kitanzania kutumia fursa ya Kongamano la Vijana juu ya Uhakiki wa Rasimu ya Dira ya Taifa ya Maendeleo 2050, kuhimiza na kuboresha maoni yatakayojumuishwa bayana kwenye Dira ya Taifa 2050.

Ridhiwani ameyasema hayo akiwa mgeni rasmi siku ya Jumatano Desemba 18, 2024 wakati wa Kongamano hilo linalofanyika katika ukumbi wa mikutano uliopo Makumbusho ya Taifa, Posta mkoani Dar es Salaam.

Amesema Serikali imeendelea kuwekeza katika maeneo mengi kama vile elimu, afya, na mambo yote ya ustawi wa jamii ili kuhakikisha vijana wanafaidika.

“Nini maoni yenu vijana juu ya haya yanayofanyika leo kwa ajili ya kesho yetu, hili ndilo jambo tunalolitaka kulisikia kutoka kwenu vijana ili tuweze kuona kipi cha kufanya”, ameeleza Ridhiwa Ridhiwani.

Amesema katika maoni mbalimbali yaliyotolewa na vijana, vijana wengi wamezungumzia kwa ukubwa uhitaji wa kuimarisha afya ili nguvukazi ya vijana ipate kuimarishwa na kuwa na tija kwao na kwa taifa kwa ujumla kwa kipindi cha miaka 25 ijayo.

“Maeneo ambayo yamefanyiwa kazi katika Sera ya Taifa ya Maendeleo ya Vijana Mwaka 2007 ambayo yamefanyiwa marejeo mwaka 2024, ni pamoja na elimu na ujuzi, uvumbuzi na ubunifu, na mapinduzi ya kidijiti nakadhalika. Mambo haya yanaweza kuchambuliwa katika kipindi kama hiki cha kutoa maoni ya Dira”, ameeleza Ridhiwani.