Wenyeviti wa Vijiji na Vitongoji waapishwa Chalinze

Imewekwa: November 30th, 2019

Kufuatia uchaguzi wa serikali za mitaa uliofanyika tarehe 28/11/2019 leo wenyeviti wa vijiji ,vitongoji na wajumbe wa halmashauri za vijiji vilivyopo katika halmashauri ya wilaya ya Chalinze wameapishwa rasmi katika ukumbi wa shule ya sekondari Lugoba ,hafla hiyo ya uapishwaji wa viongozi hao imehudhuriwa na wananchi mbalimbali kutoka maeneo wanakotoka viongozi hao.

Kwa mujibu wa msimamizi wa uchaguzi wa halmashauri ya Chalinze Bwana Shabani Millao amesema kwamba katika halmashauri yake viongozi wote walipita bila kupingwa kwa maana ya wenyeviti wa vijiji 74,wenyeviti wa vitongoji 469,wajumbe wa Halmashauri za vijiji 1318,hivyo kuleta jumla ya viongozi 1861 walioapishwa tayari kwa kuanza majukumu yao kwa mujibu wa sheria ya uchaguzi na sheria ya serikali za mitaa ya namba 7 ya mwaka 1982.

Aidha katika zoezi la uapishaji yalitolewa mafunzo na miongozo ya namna ya uendeshaji wa serikali za vijiji na vitongoji kwa maana ya kuzingatia sheria taratibu na kanuni Za nchi bila kukiuka maadili ya uongozi katika jamii na wametakiwa viongozi hao kuwa chachu ya maendeleo ikiwa ni pamoja na kuunga mkono juhudi za serikali ya awamu ya tano chini ya Rais Dkt John Pombe Magufuli yenye kauli mbiu isemayo “Hapa kazi tu”

Kwa upande wake Afisa TAKUKURU wa Chalinze Bwana Frank Duwe    

aliwaasa viongozi hao kupambana na vitendo vyote vinavyoashiria utoaji na upokeaji wa rushwa katika maeneo yao ya kazi na kuwa mabalozi wazuri wa mapambano dhidi ya rushwa katika Jamii.

Naye Afisa Usalama wilaya Bwana Ernest Singo Mbaya aliwataka viongozi hao kuwa walinzi wa amani na kuhakikisha wanazingatia viapo vyao kwa kuzisimamia sheria za nchi na katiba ya Jamhuri ya Muungano wa Tanzania na zaidi kutenda haki kwa wanaowaongoza katika maeneo yao ya utawala

Msimamizi msaidizi wa uchaguzi Bi Jane Mfuko aliwataka viongozi hao kuzingatia utawala bora na shirikishi kwa kuwataka wawe na ushirikiano wa hali ya juu na watendaji wa vijiji na kata ili kuweza kutatua kero za wananchi katika maeneo yao ya utawala na hiyo mdiyo dhana ya utawala bora katika mamlaka za serikali za mitaa.”Msiwaachie watendaji peke yao katika maamuzi yanayohusu maslahi ya umma shirikianeni na mtoe maamuzi kwa pamoja”. Mfuko alisema.

Hakimu Mfawidhi wa Mahakama ya Msoga,Mheshimiwa Imelda Raphael Ndaga aliwapa nasaha viongozi hao kabla ya kiapo na kuwataka waheshimu na kuzingatia maudhui ya kiapo na kufanya kazi ya kuhudumia wananchi kwa mujibu wa sheria taratibu na kanuni za nchi.”Kiapo hiki ni kwa mujibu wa sheria hivyo mnatakiwa kuheshimu kiapo hiki muda wote wa uongozi wenu.”Hakimu alisema.