Chalinze yapongezwa kwa Hati Safi Mfululizo miaka mitano

Imewekwa: June 18th, 2025

Na Johnn Mlyambate

Katibu Tawala wa Mkoa wa Pwani, Bwana Rashid Mchatta, ameipongeza Halmashauri ya Wilaya ya Chalinze kwa kupata hati safi mfululizo kwa kipindi cha miaka mitano, kuanzia mwaka wa fedha 2019/2020 hadi 2023/2024. Pongezi hizo zilitolewa leo, wakati wa Mkutano Maalum wa Baraza la Madiwani wa kujadili hoja za Mdhibiti na Mkaguzi Mkuu wa Hesabu za Serikali (CAG), uliofanyika katika Ukumbi wa Jakaya Kikwete, Chalinze.

Katika hotuba yake, Bwana Mchatta alieleza kuwa hati hizo safi ni ushahidi wa usimamizi mzuri wa mapato na matumizi ya fedha za umma kwa mujibu wa bajeti na sheria, sambamba na juhudi kubwa zinazofanywa na viongozi na watendaji wa halmashauri hiyo. Alibainisha kuwa licha ya mafanikio hayo, bado kuna hoja tisa za ukaguzi ambazo hazijafungwa, nyingi zikiwa ni za kisera.

“Ni jambo la kujivunia kuona hoja zimepungua kutoka 25 hadi 9, lakini halmashauri bado inapaswa kuhakikisha haina hoja yoyote inayozalishwa upya kwa kuzingatia matumizi sahihi ya fedha na mifumo ya TEHAMA,” alisema Bwana Mchatta.

Aidha, alitoa maelekezo mahsusi kuwa ifikapo Septemba 30, 2025, hoja zote zilizosalia ziwe zimejibiwa na kufungwa kikamilifu.

Kwa upande wake, Bwana Pastori Masawe, Mkaguzi Mkuu wa Nje wa Mkoa wa Pwani, aliipongeza halmashauri kwa kujibu hoja kwa usahihi na kufanikisha kufungwa kwake, huku akihimiza kuendelea kuzingatia kanuni na miongozo ya matumizi ya fedha ili kuepusha hoja mpya.

Pongezi zaidi zilitolewa na Mkuu wa Wilaya ya Bagamoyo, Mheshimiwa Shaibu Ndemanga, aliyesifu usimamizi mzuri wa matumizi ya fedha na kuzingatia sheria na taratibu za fedha, huku Mwenyekiti wa CCM Wilaya ya Bagamoyo, Bwana Abubakar Mlawa, akilitumia jukwaa hilo kuwapongeza madiwani na wataalamu kwa ushirikiano na utekelezaji madhubuti wa majukumu yao.

Naye Mwenyekiti wa Halmashauri ya Wilaya ya Chalinze, Mheshimiwa Hasani Mwinyikondo, alipokea pongezi hizo kwa niaba ya halmashauri na kutumia fursa hiyo kuaga kwa niaba ya madiwani, akiwashukuru watendaji wote kwa ushirikiano waliouonesha katika kipindi cha miaka mitano ya uongozi wao.