Mwenyekiti wa UWT akagua miradi ya maendeleo Chalinze

Imewekwa: June 13th, 2025

Na John Mlyambate

Mwenyekiti wa Umoja wa Wanawake Tanzania (UWT) Taifa, Mheshimiwa Mary Pius Chatanda, amefanya ziara ya kikazi wilayani Chalinze, mkoani Pwani, kukagua utekelezaji wa Ilani ya Chama Cha Mapinduzi (CCM) ya mwaka 2020-2025, hususan katika miradi ya maendeleo inayotekelezwa na serikali kupitia halmashauri ya wilaya hiyo.

Ziara hiyo ilifanyika tarehe 12 Juni 2025, ambapo Mheshimiwa Chatanda aliambatana na Mjumbe wa Kamati Tendaji ya UWT Taifa, Mheshimiwa Subira Mgalu, na walipokelewa na mwenyeji wao, Mwenyekiti wa CCM Wilaya ya Bagamoyo, Mheshimiwa Abubakar Mlawa. Lengo kuu la ziara hiyo lilikuwa ni kujionea utekelezaji wa miradi ya serikali na kushuhudia namna wanawake wanavyonufaika na fursa za kiuchumi kupitia mikopo na shughuli za uzalishaji.

Akiwa wilayani Chalinze, Mheshimiwa Chatanda alikagua ujenzi wa nyumba za wakuu wa Idara na Vitengo, ambazo zimejengwa kwa fedha kutoka serikali kuu. Alieleza kuridhishwa na hatua ya ujenzi na kupongeza watendaji wa serikali kwa kusimamia kwa ufanisi utekelezaji wa mradi huo ambao umelenga kupunguza changamoto ya makazi kwa watumishi wa umma.

Katika hatua nyingine, alitembelea mradi wa wanawake wa kufyatua matofali ulioanzishwa na kikundi kilichopata mkopo kutoka halmashauri ya Chalinze kupitia asilimia 10 ya mapato ya ndani. Aliwapongeza wanawake hao kwa mshikamano na ubunifu wao katika kujikwamua kiuchumi kupitia shughuli hiyo ya uzalishaji wa vifaa vya ujenzi.

Mheshimiwa Chatanda alitumia fursa hiyo kumwomba Mkuu wa Wilaya ya Chalinze kuwapatia kikundi hicho fursa ya kuuza matofali yao kwenye miradi ya serikali inayoendelea kutekelezwa katika maeneo mbalimbali ya halmashauri hiyo, ili kuongeza kipato na kukuza mtaji wao kwa maendeleo endelevu.

Aidha, katika sekta ya elimu, alitembelea Shule ya Sekondari ya Jakaya Mrisho Kikwete na kukagua miundombinu ya shule hiyo, ikiwemo mabweni, madarasa na nyumba za walimu. Alizungumza na wanafunzi pamoja na walimu kujua changamoto zinazowakabili, na kuahidi kuzifikisha katika mamlaka husika ili zipatiwe ufumbuzi.

Katika sekta ya afya, Chatanda alitembelea Hospitali ya Wilaya ya Msoga na kukagua ujenzi wa jengo la wagonjwa wa nje (OPD) na jengo la utawala linaloendelea kujengwa kwa fedha kutoka serikali kuu. Alieleza kuridhishwa na kasi na ubora wa kazi inayoendelea kufanyika kwenye hospitali hiyo muhimu kwa wananchi wa Chalinze.

Akihitimisha ziara hiyo, Mheshimiwa Chatanda alisisitiza umuhimu wa uzalendo na uadilifu kwa wataalamu wote wa halmashauri katika kusimamia miradi ya maendeleo. Alisema mafanikio ya utekelezaji wa Ilani ya CCM yanatokana na usimamizi mzuri wa miradi, hivyo ni muhimu kuendeleza juhudi hizo kwa manufaa ya wananchi wote.